Telegram messenjeri 2025-yil 31-iyul kuni foydalanuvchilarga navbatdagi yangilanishlarni joriy qildi. Bu safargi o‘zgarishlar ko‘plab foydali va qulay funksiyalarni o‘z ichiga olgan.
1. Telegram’ning premium obunachilari uchun “Postlar” nomli yangi qidiruv bo‘limi ishga tushirildi. Bu orqali foydalanuvchilar ochiq (public) kanallardagi postlarni tez va oson topishlari mumkin bo‘ladi.
Qidiruv imkoniyati ayniqsa axborot izlaydigan jurnalistlar, kontent yaratuvchilar yoki kanal boshqaruvchilari uchun foydali bo‘lishi mumkin. Bepul qidiruv so‘rovlari soni kuniga 10 taga cheklangan bo‘lib, qo‘shimcha izlash imkoniyatlari uchun 10 ta yulduz (Telegram stars) evaziga sotib olish kerak bo‘ladi.
2. Endilikda Telegram stories’larni mavzular bo‘yicha guruhlash va albomlar shaklida saqlash mumkin. Turli kanallar egalari ham o‘z “stories”larini bir necha qismdan iborat vizual to‘plamlar ko‘rinishida tartiblay oladi.
3. Foydalanuvchilarga Telegram’dagi virtual sovg‘alarni kolleksiya shaklida saqlash va ularni turi, yuborilgan vaqti yoki boshqa filtrlar asosida tartiblash imkoniyati qo‘shildi.
4. Foydalanuvchi profillarida maxsus reyting belgisi — “badge” aks etadi. Bu belgi foydalanuvchining platformadagi qanchalik faolligi Telegram valyutasi — yulduzlardan qanchalik foydalanishi asosida shakllanadi. Profilga kirgan har kim endi reyting belgisiga qarab foydalanuvchining Telegram’dagi maqomini tushunib oladi.
Bundan tashqari, Premium foydalanuvchilarga tegishli sovg‘alar tizimida ham ayrim o‘zgarishlar bo‘ldi. Cheklangan miqdorda chiqariladigan noyob sovg‘alarni xarid qilish uchun Premium obuna talab etiladi.
Yana bir muhim yangilik — BotFather interfeysining yangilanishi bo‘ldi. Endilikda foydalanuvchilar Telegram botlarini yaratishda kerakli ma’lumotlarni oddiy chat orqali emas, balki maxsus kichik ilova (mini-app) yordamida to‘ldirishlari mumkin bo‘ladi.
Izoh (0)