Misr, Qatar, Saudiya Arabistoni va Iordaniya G‘azo sektorida HAMAS harakatining boshqaruvini tugatishga chaqiruvchi hujjatni imzoladi. Bu haqda DPA agentligi ixtiyoriga kelib tushgan hujjatga tayanib xabar berdi.
Mazkur bayonotga Buyuk Britaniya, Fransiya, Kanada, Braziliya, Italiya, Ispaniya, Norvegiya va Irlandiya ham imzo chekkan. Ammo Germaniya ushbu hujjat e’lon qilingan paytda uni qo‘llab-quvvatlagan davlatlar ro‘yxatida bo‘lmagan.
Yetti sahifalik hujjatda Yaqin Sharqdagi mojaroni tugatishga doir aniq qadamlar belgilangan. Jumladan, HAMAS o‘z hukmronligini yakunlab, G‘azodagi qurollarini Falastin muxtoriyatiga topshirishi lozim. Shuningdek, hujjatda 2023-yil 7-oktyabr kuni HAMAS tomonidan Isroilga uyushtirilgan hujum qoralangani qayd etilgan.
Hujjat Nyu Yorkda “ikki davlat yechimi” bo‘yicha o‘tkazilgan konferensiya doirasida imzolangan. U sentyabr oyigacha BMT tomonidan rasman qabul qilinishi kutilmoqda. Ungacha yana bir qancha davlatlar uni qo‘llab-quvvatlashi mumkin.
Isroil G‘azoga hujumlarini to‘xtatishi kerak
Hujjatda Isroilga ham murojaat qilingan. Imzolovchi davlatlar Isroildan G‘azo sektoridagi harbiy harakatlarni zudlik bilan to‘xtatishni va Iordan daryosining G‘arbiy sohilidagi yahudiy ko‘chmanchilar faoliyatiga barham berishni talab qilgan. BMT huzurida barqarorlashtirish kuchlarini tuzish tashabbusi ham qo‘llab-quvvatlangan.
Bayonotda Falastin davlatining xalqaro miqyosda tan olinishi “ikki davlat yechimi”ning ajralmas va muhim qismi ekani ta’kidlangan.
Izoh (0)