Los-Anjelesdagi mashg‘ulot bazasida yuz bergan portlash oqibatida kamida uch nafar sherif yordamchisi halok bo‘ldi. Bu haqda AQSH bosh prokurori Pem Bondi X ijtimoiy tarmog‘idagi sahifasida xabar berdi.
“Hozirgina federal prokuror Bill Essayliga Los-Anjelesdagi huquq-tartibot xodimlari uchun mo‘ljallangan o‘quv poligonida sodir bo‘lgan fojiali hodisa to‘g‘risida ma’lumot berdim. Unda kamida uch kishi halok bo‘lgan. Iltimos, halok bo‘lgan sherif yordamchilarining oilalari uchun duo qiling”, deya yozdi Bondi.
Ma’lum qilinishicha, voqea mahalliy vaqt bilan soat 07:25 atrofida ro‘y bergan. Dastlabki ma’lumotlarga ko‘ra, huquq-tartibot idoralari xodimlari o‘q-dorilarni bir joydan boshqa joyga ko‘chirayotgan paytda portlash sodir bo‘lgan.
Bondining aytishicha, prokuratura xodimlari hodisa joyida bo‘lib, vaziyatni o‘rganmoqda.
Los-Anjeles meri Karen Bass X ijtimoiy tarmog‘idagi sahifasida ma’lum qilishicha, o‘quv markazida Alkogol, tamaki, o‘qotar qurollar va portlovchi moddalar byurosining o‘t qo‘yish bo‘yicha tergovchilari, Los-Anjeles o‘t o‘chirish xizmati va Los-Anjeles politsiya boshqarmasining sapyorlari faoliyat yuritmoqda.
Kaliforniya gubernatori Gevin Nyusom idorasining xabar berishicha, u voqeadan xabardor qilingan va gubernatorning favqulodda vaziyatlar boshqarmasi sherif departamenti bilan aloqada bo‘lib, vaziyatni sinchkovlik bilan kuzatib bormoqda.
KABC-TV telekanalidan olingan aerofotosuratga ko‘ra, portlash patrul mashinalari va sherif yuk mashinalari to‘la avtomobil to‘xtash joyida sodir bo‘lgan.
Izoh (0)