O‘zbekistonda ayrim hollarda xavfli turdagi pirotexnika buyumlaridan foydalanishga ruxsat berilishi mumkin. Bu bo‘yicha qonun loyihasi deputatlar tomonidan birinchi o‘qishda qabul qilindi.
Oliy Majlis Qonunchilik palatasining navbatdagi majlisida “O‘zbekiston Respublikasi hududida pirotexnika buyumlarining muomalasi to‘g‘risida”gi qonun loyihasi birinchi o‘qishda ko‘rib chiqilmoqda.
Ushbu qonun loyihasi bilan ayrim pirotexnika buyumlarini, xususan, xavfli hududi kichik bo‘lgan Bengal mayoqchalari, dasturxonni va tortlarni bezashda ishlatiladigan turli effektlar beruvchi pirotexnika buyumlarini jismoniy va yuridik shaxslar tomonidan yaratish, ishlab chiqarish, O‘zbekiston hududiga olib kirish, tashish, realizatsiya qilish, sotib olish, saqlash va ulardan foydalanishga oid amaldagi tartib saqlab qolinmoqda.
Shu bilan birga, qolgan xavfli turdagi pirotexnika buyumlarini esa faqatgina texnik va maxsus maqsadlarda yaratish, ishlab chiqarish, saqlash, tashish, realizatsiya qilish va foydalanishga ruxsat berish ko‘zda tutilyapti.
Qayd etilishicha, qonun loyihasi pirotexnika buyumlari muomalasi sohasida nazoratni kuchaytirish va ta’sir choralarining samaradorligini oshirish, shuningdek sohadagi huquqbuzarliklarning oldini olish hamda maxsus moslashtirilmagan sharoitlarda, noma’lum, sifasiz komponentlardan ishlab chiqarilgan va sertifikatlanmagan, respublika hududiga noqonuniy yo‘llar bilan olib kirilgan pirotexnika buyumlaridan aholining jabrlanishi va zarar ko‘rishi holatlarini bartaraf etishga qaratilgan.
Majlisda qonun loyihasi deputatlar tomonidan birinchi o‘qishda qabul qilindi.
Amaldagi qonunchilikka ko‘ra, pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, ulardan foydalanish, xuddi shuningdek ularni qonunga xilof ravishda O‘zbekiston Respublikasiga olib kirish maʼmuriy yoki jinoiy javobgarlikka sabab bo‘ladi.
2024-yil avgust oyidan O‘zbekistonda pirotexnika buyumlarining qonunga xilof muomalasi uchun javobgarlik kuchaytirilgan. Prezident tomonidan imzolangan qonun bilan Ma’muriy javobgarlik to‘g‘risidagi kodeksga o‘zgartirishlar kiritilgan.
Jazo kuchaytirilgan
Ma’muriy javobgarlik to‘g‘risidagi kodeksga kiritilayotgan o‘zgartirishga ko‘ra:
- pirotexnika buyumlari ishlatganlik uchun — bazaviy hisoblash miqdorining besh baravaridan (1 million 700 ming so‘m) yigirma besh baravarigacha (8 million 500 ming so‘m) miqdorda;
- pirotexnika buyumlari savdosi bilan shug‘ullanganlik uchun — bazaviy hisoblash miqdorining o‘n besh baravaridan (5 million 100 ming so‘m) o‘ttiz baravarigacha (10 million 200 ming so‘m) miqdorida;
- respublikaga olib kirish (O‘zbekiston Respublikasidan olib chiqish) yoki o‘tkazish — bazaviy hisoblash miqdorining o‘ttiz baravaridan (10 million 200 ming so‘m) ellik baravarigacha (17 million so‘m) miqdorda jarima solishga sabab bo‘ladi.
Izoh (0)