Adliya vazirligi tomonidan Zomin qozon patiri geografik ko‘rsatkich sifatida ro‘yxatdan o‘tkazildi. Bu haqda vazirlik axborot xizmati xabar berdi.
Geografik ko‘rsatkich bu mahsulotning ma’lum hududga xosligini va sifatini huquqiy jihatdan himoya qiluvchi belgi. U mahsulotning kelib chiqish joyini, an’anaviy retseptini va o‘ziga xos xususiyatlarini davlat darajasida kafolatlaydi.
Zomin qozon patiri Jizzax viloyatining Zomin tumanida qadimdan tayyorlanadigan non mahsuloti bo‘lib, alohida qorilgan xamir, mahalliy sut va sariyog‘ bilan qozonda pishiriladi. U o‘zining ta’mi va sifat xususiyatlari bilan ajralib turadi.
Endi “Zomin qozon patiri” O‘zbekiston davlat reyestrida 20-geografik ko‘rsatkich sifatida ro‘yxatdan o‘tgan bo‘lib, uning nomi, sifati va kelib chiqish manbai qonuniy himoyaga ega bo‘ladi.
Qayd etilishicha, bu hududiy brendni rivojlantirish, mahalliy ishlab chiqaruvchilarni qo‘llab-quvvatlash va iste’molchilarga sifatli, original mahsulotni taqdim etishga xizmat qiladi.
2024-yil yanvarida G‘uzor tandir go‘shti geografik ko‘rsatkich sifatida davlat ro‘yxatidan o‘tkazilgandi. Bundan tashqari G‘ijduvon shashlik, Zomin tandir go‘shti, Marg‘ilon adrasi va Qo‘qon pichoqlari ham patentlangandi.
2025-yil 5-fevral kuni esa Samarqand noni geografik ko‘rsatkich sifatida ro‘yxatga olindi. Iyun oyida esa tuxumbarak geografik ko‘rsatkich sifatida patentlandi. Shuningdek, Andijon do‘ppisi ham patentlandi.
18-iyun kuni So‘qoq somsa ham geografik ko‘rsatkich sifatida patentlandi. 3-iyul kuni Samarqand no‘xat sho‘ragi geografik ko‘rsatkich sifatida davlat ro‘yxatidan o‘tkazildi.
Izoh (0)