Samarqandda eriga zo‘ravonlik qilgan ayol 4 yilga qamaldi

Samarqand viloyati Kattaqo‘rg‘on tumanida eriga zo‘ravonlik qilgan ayol 4 yilga qamaldi. Oliy sud bu haqda “Daryo”ga ma’lum qildi. 

Sud hujjatida keltirilishicha, sudlanuvchi X.H. turmush o‘rtog‘i X.A. bilan doimiy ravishda o‘zaro oilaviy kelishmovchiliklar sababli janjallashib kelgan. 2025-yil 11-yanvar kuni soat 12:00 larda uyiga narsalarini olish maqsadida borgan vaqtida yana o‘zaro janjal kelib chiqib, janjal vaqtida turmush o‘rtog‘i X.A.ni (tergov jarayonida aniqlashni imkoni bo‘lmagan) tosh bilan chap ko‘z sohasiga qasddan urgan.

Ayol unga umumiy mehnat qobiliyatini 35 foiz yo‘qolishiga sababchi bo‘lib, qasddan “og‘ir tan jarohati” yetkazib, oilaviy zo‘ravonlik qilgan. Ayol sudda eri uni spirtli ichimlik ichib kelib urishini, hech qayerda ishlamasligini, oilani tashvishlari faqat o‘ziga qolib ketganini, shu sababli ikkalasi janjallashib qolishganini bildirgan. 

Ayblanuvchi ayol Jinoyat kodeksining 126-moddasi (oilaviy maishiy zo‘ravonlik) 7-qismining “j” bandida nazarda tutilgan jinoyatni sodir etganlikda aybli deb topildi va 4 yilga qamaldi.

2023-yil 11-aprelda “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun qabul qilindi. Qonun bilan Jinoyat kodeksi 126-1-modda (oilaviy (maishiy) zo‘ravonlik) va Ma’muriy javobgarlik to‘g‘risidagi kodeks 59-2-modda (oilaviy (maishiy) zo‘ravonlik) bilan to‘ldirildi.