Buyuk Britaniyalik 21 yoshli Zara Laxlan Ginnes rekordlari kitobiga kiritildi. U Yevropadan Janubiy Amerikaga qayiqda yolg‘iz o‘zi Atlantika okeanini kesib o‘tgan birinchi ayol bo‘ldi.
Qiz Portugaliyaning Lagush shahridan yo‘lga chiqib, Fransuz Gvianasining Kayenna shahriga yetib keldi. U 97 kun ichida 7026 kilometr masofani bosib o‘tdi. Bu haqda Ginnes rekordlari kitobi rasmiy saytida ma’lum qilingan.
Bunga qadar Zara katta sinovga tayyorgarlik ko‘rib, besh yil davomida eshkak eshish bilan jiddiy shug‘ullangan.
Sayohat paytida Zara kuniga 17 soat eshkak eshdi. Kayennaga yetib kelgach, u uchta rekordni o‘rnatdi: Atlantika okeanini Yevropadan Janubiy Amerikaga kesib o‘tgan birinchi ayol, bu yo‘nalishning eng yosh ishtirokchisi va uni hech qanday yordamsiz bosib o‘tgan birinchi ayol sifatida tan olindi.
Suzish juda mashaqqatli kechdi. Qiz gallyutsinatsiyalarga duch keldi, uni bir necha bor barrakudalar tishlab oldi, qayig‘i ortidan akula ergashdi va bir kuni u kosatkalar to‘dasini ko‘rib qoldi. Ammo shunda ham u taslim bo‘lmadi va maqsadiga erishdi.
Izoh (0)