Forbes jurnali ijtimoiy tarmoqlardagi eng ko‘p daromad topuvchi va ta’sir ko‘lamiga ega 50 nafar blogerlar reytingini e’lon qildi.
Ma’lumotlarga ko‘ra, to‘rtinchi yil ketma-ket ro‘yxatning birinchi pog‘onasini Mr.Beast egalladi. Uning yillik daromadi 85 million dollar deb baholangan, obunachilari soni esa 634 millionga yetgan.
Ikkinchi o‘rinda bloger, tadbirkor va kinoprodyuser Dhar Mann qayd etilgan, uning daromadi 56 million dollar, obunachilar soni 137 million. U o‘z faoliyati orqali haqiqiy Gollivud studiyasini tashkil qila olgan.
Uchinchi o‘rinni esa inflyuenser va professional bokschi Jeyk Pol egalladi. Uning daromadi 50 million dollar, obunachilari esa 79 million. Uning noyabr oyida Mayk Taysonga qarshi o‘tkazilishi rejalashtirilgan jangi katta shov-shuvga sabab bo‘lgan.
Shuningdek, ushbu reytingga TikTok’dagi yangi yulduzlar — Aliks Irl, Jeyk Sheyn va Nara Smit, Call Her Daddy podkastining boshlovchisi Aleks Kuper, YouTube’da bolalar blogeri Ms.Rachel, raqqosa va qo‘shiqchi Eddison Rey (yaqinda o‘zining Addison nomli debyut albomini chiqargan), Druski va Adam W. kabi komiklar ham kirgan.
Yangi blogerlar orasida DJ va TikTok yulduzi Xandra, yurist va moliyaviy masalalar bo‘yicha mutaxassis Erika Kullberg, shuningdek model va inflyuenser Wisdom Kaye ham bor.
Joriy yilda Forbes ro‘yxatiga kirgan 50 nafar bloger umumiy hisobda qariyb 853 million dollar ishlab topgan. Bu 2024-yilga nisbatan 18,5 foizga ko‘p. Shu bilan birga, ularning umumiy auditoriyasi ham oshgan: reyting ishtirokchilarining jami obunachilari soni 3,37 milliard kishidan oshgan, bu esa o‘tgan yilga nisbatan 25 foiz ko‘p degani.
Forbes mazkur ro‘yxatni tuzishda uchta asosiy mezonni inobatga olgan: daromad, tadbirkorlik faolligi hamda obunachilar soni va ularning faolligi.
Izoh (0)