Rossiya 12-iyunga o‘tar kechasi Shahed tipidagi hujumchi dronlardan foydalangan holda yana Xarkov shahrini o‘qqa tutgan. Bu haqda Deutsche Welle xabar berdi.
Shahar meri Igor Terexovga ko‘ra, Rossiya harbiylari bir kechada Xarkovga 12 ta zarba bergan. Dronlardan biri maktab hududiga, ikkinchisi esa bolalar bog‘chasi maydonchasiga kelib urilgan.
Bundan tashqari, Xarkovning Saltovskiy tumanidagi 2 ta turar joy binosi va fitnes markazi ham zarbalar qurboni bo‘lgan. Hujum oqibatida kamida 11 kishi, jumladan, 4 nafar bola yaralangani ochiqlangan.
“Turar joylar, ta’lim muassasalari, bolalar bog‘chalari va infratuzilma obyektlari yonib ketdi. O‘nlab mashinalar shikastlangan, maktablar va uylarning oynalari singan”, dedi Terexov.
Xarkov kecha, 11-iyunga o‘tar kechasi ham rus harbiylari tomonidan o‘qqa tutilgandi. Qurolli kuchlar 17 ta Shahed dronlari bilan Xarkovning 2 tumani — Slobodskiy va Osnovyanskiy tumanlariga zarbalar bergandi. Hujum oqibatida 3 kishi halok bo‘lib, 60 kishi yaralangandi. Ular orasida 7 nafar bola bo‘lgan.
Iyun oyida Rossiya harbiylari bir necha marta Xarkovga bomba tashlagan. 7-iyunga o‘tar kechasi rus qo‘shinlari shaharga Ukrainaga bosqin boshlanganidan beri eng yirik zarbalarni bergan. Terexovga ko‘ra, shaharga 48 ta “shahedl hujumchi dronlari, 2 ta raketa va 4 ta boshqariladigan havo bombasi uchirilgan. O‘sha hujumda 6 kishi halok bo‘lgandi.
Izoh (0)