Suriya 10-iyun kuni ayollar uchun plyajda konservativ yangi kiyinish tartibini e’lon qildi. Bu haqda CNN xabar berdi.
Unga ko‘ra, ayollar barcha jamoat plyajlarida burkinida (tanani butunlay yopadigan suzish kiyimi) yurishlari shart. Bu 2024-yilning dekabr oyida islomiy isyonchilar Bashar Asad rejimini ag‘darganidan beri so‘nggi madaniy o‘zgarish hisoblanmoqda. Turizm vazirligi yangi tartib “jamoatchilik manfaatlari talablari” asosida ishlab chiqilganini ma’lum qilgan.
“Jamoat plyajlari va basseynlariga tashrif buyuruvchilar — xoh sayyohlar, xoh mahalliy aholi bo‘lsin — jamoatchilik didi va jamiyatning turli qatlamlarining his-tuyg‘ularini hisobga olgan holda tegishli suzish kiyimlarini kiyishlari shart. Plyaj va boshqa joylar o‘rtasida harakatlanayotganda ayollar cho‘milish kostyumlari ustidan yopinchiq yoki keng xalat kiyishi lozim”, dedi turizm vaziri Mazen al-Salxaniy.
Erkaklar ham yangi tartib bo‘yicha ko‘ylak kiyishlari shart. Suv havzalari, mehmonxona vestibyullari va umumiy ovqatlanish joylaridan tashqaridagi jamoat joylarida ustki kiyimsiz yurishga ruxsat berilmasligi ham ta’kidlangan.
“Plyaj va basseynlardan tashqari jamoat joylarida yelka va tizzalarni yopib turadigan keng kiyim kiyish, shaffof yoki haddan tashqari tor kiyimlardan voz kechish afzal”, deya erkaklarga ko‘rsatma berilgan.
Shu bilan birga, vazirlik xalqaro va premium (4 yulduzli) toifadagi dam olish maskanlari va mehmonxonalarda, shuningdek, xususiy plyajlar va basseynlarda odatiy G‘arb cho‘milish kiyimlariga ruxsat berilishi aytilgan. Xavfsizlik qo‘riqchilari va plyaj nazoratchilari qoidalarga rioya qilinishini ta’minlash uchun odamlarni kuzatishi ta’kidlangan.
Izoh (0)