Yaponiyada guruhidan qat’i nazar, barcha odamlarga quyish uchun mos keladigan sun’iy qon yaratildi. Bu haqda Tokyo Weekender xabar berdi.
U muddati o‘tgan donor qonidan ajratib olingan gemoglobindan ishlab chiqariladi. Shundan so‘ng barqaror va virussiz sun’iy eritrotsitlar hosil qilish uchun maxsus qobiq bilan o‘raladi.
Ushbu sun’iy hujayralar qon guruhiga ega bo‘lmagani sababli muvofiqlikni tekshirishga ehtiyoj qolmaydi, deyiladi xabarda.
Sun’iy qonni xona haroratida ikki yilgacha, muzlatgichda esa besh yilgacha saqlash mumkin. Taqqoslash uchun, donor eritrotsitlarini muzlatkichda uzog‘i 42 kun saqlasa bo‘ladi.
Ixtironing ilk sinovlari 2022-yilda sog‘lom ko‘ngillilar ishtirokida boshlangan, agar bunday qonni quyishning xavfsizligi va samaradorligi tasdiqlansa, uning amaliy qo‘llanishi 2030-yilga kelib boshlanishi mumkin, dedi loyiha rahbari professor Xiromi Sakai.
Olimlarning ixtirosi donor qoni yetishmovchiligi muammosini hal qilishi kutilmoqda. Bundan tashqari, u qon quyishga tayyorgarlik ko‘rish vaqtini qisqartiradi va shoshilinch yordamni yanada samarali qiladi.
Avvalroq kiotolik bir guruh olimlar insonning yo‘q bo‘lib ketgan qarindoshlari — neandertallar va denisovliklarga xos bo‘lgan GLI3 genining qadimiy versiyasini laboratoriya sichqonlari DNKsiga kiritib, tajriba o‘tkazgandi. Natijada genning bu variantini olgan sichqonlarda neandertallarda uchraydigan anatomik xususiyatlar shakllana boshlagan.
Izoh (0)