Qozog‘istonning Turkiston viloyatida vertolyotlar va uchuvchisiz uchish apparatlari, shu jumladan odamlar va yuklarni tashish uchun mo‘ljallangan dronlar ishlab chiqaradigan yangi zavod barpo etilishi kutilmoqda. Bu haqda Turkiston viloyati hokimligi axborot xizmati xabar bermoqda.
Ma’lum qilinishicha, Turkiston viloyati hokimi Nuralxon Kusherov investor vakili bilan uchrashuvda loyihani amalga oshirish shartlarini muhokama qilgan. Xorijiy kompaniya Turkiston viloyatiga taxminan 290 million dollar miqdorida sarmoya kiritishni rejalashtirmoqda. Zavod 150 tagacha yangi ish o‘rni yaratishi va mintaqa sanoatida yangi yo‘nalishlarni rivojlantirishga turtki bo‘lishi kutilyapti.
Korxona ham fuqarolik, ham ehtimoliy maxsus vertolyot va dron modellarini ishlab chiqaradi. Ular logistika, qishloq xo‘jaligi, turizm, infratuzilmani nazorat qilish va boshqa sohalarda qo‘llaniladi.
Loyiha iqtisodiyotning tez rivojlanayotgan sektori — quyi aviatsiyaga, ya’ni 3000 metrgacha balandlikda uchuvchi apparatlarga qaratilgan. Bu shahar havo transporti, tovarlarni yetkazib berish va dronlar yordamida favqulodda yordam ko‘rsatish, shuningdek, ulardan qishloq xo‘jaligi hamda sanoat tarmoqlarida foydalanishni o‘z ichiga oladi.
Izoh (0)