Pokistonning Lahor shahrida O‘zbekiston savdo uyi ochildi. Bu haqda Savdo-sanoat palatasi matbuot xizmati xabar berdi.
Qayd etilishicha, ushbu savdo uyi ikki mamlakat tadbirkorlari o‘rtasidagi to‘g‘ridan-to‘g‘ri savdo va hamkorlikni yanada faollashtirishga xizmat qiladi. Unda O‘zbekistondan keltirilgan quruq mevalar, teri, ip-kalava, dori-darmon va tibbiyot buyumlari, kimyo va boshqa mahsulotlar namoyish etiladi.
25-iyun kuni Karachi shahrida O‘zbekiston va Pokiston ishbilarmonlari o‘rtasida biznes-forum o‘tkazish rejalashtirilgan. Avvalgi biznes-forum Toshkentda fevral oyi oxirlarida bo‘lib o‘tgandi. O‘shanda tomonlar O‘zbekiston va Pokistonda biznes vakillarini keng jalb qilgan holda ishbilarmonlik tadbirlarini muntazam — yiliga kamida ikki marta o‘tkazib borishga kelishgandi.
O‘zbekiston—Pokiston iqtisodiy hamkorligi
Ikki davlat iqtisodiy hamkorligi yangi loyihalar bilan boyimoqda. Pak Merit, Diamond Group, Silk-way, Getz Pharm, Gerbion, NLS va boshqa kompaniyalar bilan loyihalar amalga oshirilmoqda. Transport va logistika imkoniyatlari kengaymoqda. So‘nggi yillarda mamlakatlar o‘rtasida yuk tashish hajmi 5 barobar oshdi. Ushbu sohadagi hamkorlikni kengaytirish maqsadida qo‘shma transport-logistika kompaniyasini tashkil etish rejalashtirilgan.
Toshkentda ham Pokiston savdo uyi bor. Bu savdo uyi ikki davlat o‘rtasidagi savdo-iqtisodiy aloqalarni mustahkamlash maqsadida tashkil etilgan.
Izoh (0)