“Barselona” klubining 17 yoshli hujumchisi Lamin Yamal CIES (Xalqaro sport tadqiqotlari markazi) tomonidan dunyodagi eng qimmat futbolchi deb e’tirof etildi — uning transfer qiymati 402,3 million yevroga baholangan.
Bu ko‘rsatkich uning atigi 17 yoshda bo‘lishiga (2024-yil iyul oyida 18 ga to‘ladi) qaramay, maydondagi yuqori darajadagi harakatlari bilan bog‘liq. Reytingning ikkinchi pog‘onasida norvegiyalik hujumchi Erling Holand (239,6 mln yevro), uchinchi o‘rinda esa ingliz yarim himoyachisi Jud Bellingem (233,8 mln yevro) qayd etilgan. To‘rtinchi o‘rinda fransiyalik hujumchi Kilian Mbappe (192,5 mln yevro) joy olgan. U kuchli o‘nlikda eng yoshi katta futbolchi hisoblanadi — 26 yosh.
Angliya Pryemer Ligasi kuchli 100 talik ro‘yxatda eng ko‘p futbolchiga ega – jami 42 futbolchi. Undan keyin Ispaniya La Ligasi – 19 futbolchi bilan. Klublar orasida esa “Pari Sen-Jermen” yetakchilik qilmoqda. Parijliklarning 11 futbolchisi kuchli yuztalikdan o‘rin olgan.
CIES talqiniga ko‘ra, eng qimmat 10 nafar futbolchi:
- Lamin Yamal (“Barselona”) — 402,3 mln yevro
- Erling Holand (“Manchester Siti”) — 239,6 mln yevro
- Jud Bellingem (“Real Madrid”) — 233,8 mln yevro
- Kilian Mbappe (“Real Madrid”) — 192,5 mln yevro
- Jamol Musiala (“Bavariya”) — 154,8 mln yevro
- Pedri (“Barselona”) — 143,7 mln yevro
- Vinisius Junior (“Real Madrid”) — 130,4 mln yevro
- Koul Palmer (“Chelsi”) — 126,5 mln yevro
- Xulian Alvares (“Atletiko”) — 126 mln yevro
- Florian Virts (“Bayer”) — 122,3 mln yevro
Himoya chizig‘i bo‘yicha eng qimmat futbolchilar:
Markaziy himoyachilar ichida — Pau Kubarsi (118 mln yevro)
Qanot himoyachilari orasida — Yoshko Gvardiol (100,7 mln yevro)
Darvozabonlar ichida — Bart Verbruggen (64,3 mln yevro)
Reytingdagi 100 nafar futbolchidan atigi 4 nafari Yevropaning kuchli beshlik ligalaridan tashqarida to‘p suradi:
Portugaliya: Samu Aghexova va Viktor Dyokeresh,
Braziliya: Estevao Villian (u “Chelsi” bilan shartnoma imzolagan),
Saudiya Arabistoni: Jon Dyuran.
Izoh (0)