Gollivud yulduzlarining hayoti ko‘pincha ertakka o‘xshaydi: omma oldidagi muhabbat izhorlari, qimmatbaho uzuklar, dabdabali to‘y haqidagi orzular. Ammo turmush qurish qarori va dabdabali unashtiruvdan keyin ham to‘y bo‘lmaslik ehtimoli yuqori. Maqolada unashtiruvi to‘satdan buzilgan eng mashhur yulduzlarning sevgi hikoyalari haqida so‘z boradi.
Ba’zida jamoatchilik bosimi, shaxsiy muammolar yoki ikkilanishlar eng chiroyli rejalarning ham barbod bo‘lishiga olib keladi.
Jennifer Lopes va Ben Afflek
2000-yillarning boshlarida dunyo tomoshabinlari Bennifer juftligining munosabatlari rivojini katta qiziqishlar bilan kuzata boshladi. Ularning muhabbati film suratga olish maydonida boshlanadi. Ko‘p o‘tmay Ben Jenniferga mashhur Harry Winston’ning 6 karatli pushti olmos uzugi bilan turmush qurishni taklif qiladi. Bu uzuk darhol butun dunyoda muhokama markaziga aylanadi.
To‘y 2003-yil sentyabriga belgilangan, yuzlab mehmonlar taklif qilingan, barcha tayyorgarliklar yakunlangan edi. Ammo marosimga atigi bir necha kun qolganda kutilmagan xabar — to‘y qoldiriladi.
Rasmiy sabab ommaviy axborot vositalarining bosimi, ularning “bu ajoyib kunni his qilish imkonini yo‘qqa chiqargani” deb ko‘rsatiladi. Biroq oradan ko‘p o‘tmay ayon bo‘ladiki, masala faqat jurnalistlar bosimi emas edi. Doimiy e’tibor, zo‘rayib borayotgan bosim va, ehtimol, ikkilanishlar juftlik orasida ziddiyat keltirib chiqargan. Nihoyat, 2004-yil yanvarida ular ajralganini rasman e’lon qiladi.
Ammo 2021-yilda Bennifer yana butun dunyoni hayratga soldi. Oradan qariyb 20 yil o‘tib, ular munosabatlarini tiklashdi. 2022-yilda esa ikki marotaba to‘y qildi — biri sirli tarzda Las Vegasda, ikkinchisi esa tantanali tarzda Jorjiyada. Go‘yo baxtli yakun ro‘yobga chiqqanday edi.
Ammo bu urinish ham muxlislar orzu qilganidek tugamadi. 2024-yilda Jennifer Lopes va Ben Afflek ajrashish uchun ariza topshirdi.
Ularning muhabbati ikki bora katta va’dalar bilan boshlangan, lekin har safar ayriliq bilan yakunlangan go‘zal, ammo murakkab sevgi hikoyasiga aylandi.
Ariana Grande va Pit Devidson
2018-yil may oyida mashhur qo‘shiqchi Ariana Grande va komik aktyor Pit Devidson uchrashishni boshlaydi. Oradan bir oy o‘tib, iyun oyida ular unashtirilganini e’lon qilishdi. Pit Arianaga deyarli 100 ming dollar turadigan yirik, noksimon olmos uzuk taqdim etdi. Ularning muhabbati haqiqiydek edi: bir xil tatuirovkalar, ijtimoiy tarmoqlardagi doimiy muhabbat izhorlari, birga jamoat oldida chiqishlar…
Ammo oradan atigi to‘rt oy o‘tib, 2018-yil oktyabrida bu ertak yakuniga yetdi. Turli manbalar voqea juda tez rivojlanganini aytishdi. Juftlik shunchaki bunday jiddiy qadamga tayyor emasligini anglab yetgan. Bundan tashqari, Ariana uchun og‘ir zarba bo‘lgan voqea ham bor edi: sentyabr oyida uning sobiq sevgilisi — rep ijrochisi Mak Miller fojiali tarzda vafot etdi. Bu hodisa Arianani ruhiy jihatdan larzaga soldi. Ustiga ustak, ularning har bir qadami OAV va jamoatchilik tomonidan kuzatilib, tahlil qilinayotgan edi.
Pit keyinchalik intervyularida tan olgan: Millerning vafotidan so‘ng u Arianaga bo‘lgan munosabatlariga nuqta qo‘yish vaqti kelganini anglagan. Ajralish og‘riqli kechdi — tatuirovkalarni o‘chirishga to‘g‘ri keldi, uzukni esa Ariana qaytarib bergan.
Selena Gomes va The Weeknd
Rasmiy ravishda uzuk taqdim etilmagan va “unashtirilgan” maqomi bo‘lmasa-da, bu juftlik ushbu ro‘yxatdan chetda qololmaydi. Chunki ularning muhabbati shunchalik jiddiy va ochiq bo‘lganki, to‘y haqidagi mish-mishlar doimo muhokama markazida bo‘lgan. Selena Gomes va Abel Tesfaye (The Weeknd) 2017-yil boshida uchrashishni boshlagan, munosabatlari tez sur’atda rivojlangan. Juftlik ko‘plab jamoaviy tadbirlarda, jumladan, Met Gala’da birga ko‘ringan, birgalikda sayohat qilgan. Hatto Abel Selenani o‘z oilasi bilan tanishtirgan edi.
Manbalarga ko‘ra, ular birga yashay boshlashgan va jiddiy kelajak, jumladan, to‘y haqida ham suhbatlar bo‘lgan. Ammo 2017-yil kuzida, deyarli 10 oylik munosabatdan so‘ng, juftlik ajraldi. Bunga bir nechta sabablar ko‘rsatilgan: avvalo, har ikkala san’atkorning juda tig‘iz ish jadvali, shuningdek, Selenaning salomatligi bilan bog‘liq murakkab davri — lupus (tovon bezi yallig‘lanishi) kasalligi va bu sababli bo‘lib o‘tgan buyrak ko‘chirib o‘tkazish jarayoni.
Bundan tashqari, paparatssilar Selenani tobora ko‘proq uning sobiq sevgilisi — Jastin Biber bilan birga payqashgan. Bu holat juftlikning ajralishiga ta’sir qilganmi yoki yo‘qmi — bu borada aniq ma’lumot yo‘q.
Merayya Keri va milliarder Jeyms Peyker
2016-yil yanvarda mashhur xonanda Merayya Keri avstraliyalik milliarder Jeyms Peyker bilan unashtirilganda, butun dunyo hayratda qoldi. Peyker unga taxminan 10 million dollar turadigan, 35 karatli olmos uzuk sovg‘a qilgan edi. Bu haqiqatan ham qirollik darajasidagi unashtiruv edi. Juftlik Bora-Borada hashamatli to‘y o‘tkazishni rejalashtirgan.
Ammo munosabatlar nikohgacha yetib kelolmadi. 2016-yil oktyabrida, unashtirilganidan bir yil o‘tib, ajralish haqida xabarlar tarqaldi. Ajralish tashabbusi Peykerdan chiqqan. Turlicha sabablar aytildi: Peyker Merayyaning realiti-shoudagi ishtiroki va uning haddan tashqari xarajatlariga norozilik bildirgani, shuningdek, kelajak haqidagi qarama-qarshiliklar asosiy omillar bo‘lgan.
Merayya esa o‘ziga xos uslubda munosabat bildirdi: u nafaqat o‘sha katta uzukni o‘zida qoldirdi, balki ko‘pchilik fikricha, ajralishga bag‘ishlangan “I Don’t” qo‘shig‘ini ham kuyladi.
Muhabbat va munosabatlar — murakkab masala, hatto mashhur va boy bo‘lsangiz ham. Unashtiruv — bu faqat va’dadir, garov emas. Ba’zida to‘y oldidan ajralish, qanchalik og‘riqli va oshkora bo‘lmasin, eng to‘g‘ri qaror bo‘lib chiqadi.
Izoh (0)