YouTube’dagi eng yirik kanal egasi MrBeast (asl ismi Jimmi Donaldson) yaqin kunlarda o‘zining to‘yini o‘tkazish uchun onasidan qarz olishga majbur bo‘lganini aytdi. Bu haqda bloger X ijtimoiy tarmog‘ida yozib qoldirdi.
Uning so‘zlari Dexerto tomonidan yozilgan postga javoban bildirilgan. Nashrda yerda MrBeast “30 yoshgacha o‘z boyligini meros qilib olmagan yagona milliarder” deb atalgan edi. Bloger esa javoban shunday dedi:
“Qizig‘i, men to‘yimni o‘tkazish uchun onamdan pul olishga majbur bo‘ldim”.
MrBeast’ning ta’kidlashicha, uning shaxsiy hisobida katta miqdorda mablag‘ yo‘q, chunki vloger barcha pullarini yangi loyihalarga sarmoya qiladi. Joriy yilda u yangi kontent ishlab chiqarishga 250 million dollar sarflashni rejalashtirgan.
Foto: Essentially Sports
“Albatta, hujjatlarda menga tegishli biznes juda katta qiymatga ega”, deya qo‘shimcha qildi u.
Fevral oyida Bloomberg agentligi MrBeast’ning Beast Industries kompaniyasi 5 milliard dollar miqdorida investitsiya jalb qilayotgani haqida xabar bergan edi. Business Insider esa blogerning 2023-yildagi daromadi 473 million dollarni tashkil qilganini ma’lum qilgan.
Foto: Rolling Stone
Ma’lumot o‘rnida: Jimmi Donaldson 1998-yil 7-mayda AQSHning Shimoliy Karolina shtati, Grinvil shahrida tug‘ilgan. U bolaligidan video o‘yinlar va Internetga qiziqib kelgan, bu esa uni 2012 yilda o‘zining YouTube kanalini yaratishga olib keldi. Kanalni ochganda Jimmi atigi 13 yoshda edi. Avvaliga Donaldson turli janrlarda va mavzularda videolar yaratishga harakat qilgan: bloger video o‘yinlar, turli mahsulotga tavsif va sharh berdi, shaxsiy hayoti haqida vloglar olgan.
2024-yilning iyunida MrBeast YouTube’dagi eng ko‘p obunachiga ega kanal egasiga aylangan, o‘sha paytda uning auditoriyasi 268 million kishidan iborat edi. Bugunga kelib esa bu raqam 400 milliondan oshgan.
Izoh (0)