Garri Potter haqidagi yangi serialda bosh rollarni ijro etadigan yosh aktyorlarning hayoti, albatta, yaxshi tomonga o‘zgaradi. Hech bo‘lmaganda moliyaviy jihatdan shunday bo‘lishi aniq.
Garri Poter brendi bo‘yicha ekspert Daily Mailʼga bu bolalar “jekpotni yutib olishdi” va yangi rollar ularning hayotini butunlay o‘zgartirib yuboradi, deb aytdi. Baʼzi maʼlumotlarga ko‘ra, ular bir seriya uchun 1 mln 400 ming dollargacha olishlari mumkin.
Taʼkidlash joizki, Garri Potterning avvalgi talqinida bosh rollarda o‘ynagan aktyorlar Deniel Redkliff taxminan 115 mln dollar, Emma Uotson 84 mln dollar va Rupert Grint 50 mln dollar ishlab topgan.
Eslatib o‘tamiz, Garri Potter filmini serial sifatida suratga tushirish kampaniyasi 2023-yilning bahorida eʼlon qilingan edi. Serial 2026-yilda debyut qilinishi kutilmoqda. Serial yetti mavsumdan iborat bo‘lib, xuddi kitoblardagi kabi, ularning har birida oltitadan epizod bo‘ladi. Serial ssenariy muallifi Francheska Gardiner va rejissyor Mark Maylod tomonidan yaratilmoqda.
Mashhur franshizani qayta ishga tushirish uchun esa Buyuk Britaniyada maxsus shahar qurildi, uning xarajatlari bir milliard yevroga baholanmoqda.
Izoh (0)