Xorazm viloyatining Yangiariq tumanidagi metallolom yig‘ish shoxobchasida portlash yuz berdi, deb xabar bermoqda Kun.uz o‘z manbasiga tayanib.
Maʼlum qilinishicha, hodisa 11-aprel kuni sodir bo‘lgan. Qayd etilishicha, yig‘ib kelingan temir-tersaklar tushirilayotganda ular orasida bo‘lgan snaryad portlab ketgan. Oqibatda shu yerda ishlovchi 31 yoshli O.B. og‘ir tan jarohati olib, vafot etgan.
Snaryadlar Qoraqalpog‘iston Respublikasi Amudaryo tumanida harbiy xizmatchilardan sotib olingan.
Ijtimoiy tarmoqlarda tarqalgan xabarlarga ko‘ra, portlashdan so‘ng voqea joyiga huquq-tartibot organlari xodimlari va sapyorlar yetib borgan. O‘rganish jarayonida shoxobchadan yana 30 ga yaqin snaryad topilgan.
Tarmoqlardagi videoda marhum O.B.ning onasi o‘g‘li oila boquvchisi bo‘lganini, uning 2 farzandi yetim qolganini aytgan. Ona snaryadlarni sotgan va sotib olib shoxobchaga keltirgan shaxslarga qatʼiy jazo qo‘llashni so‘ragan.
Hozirda mazkur ishni harbiy prokuratura o‘rganayotgani, metallolom yig‘uvchi va unga snaryadlarni sotgan harbiy xizmatchilar ustidan tergov boshlangani, ayrimlari qamoqqa olingani aytilmoqda.
Izoh (0)