Ijtimoiy himoya milliy agentligi tomonidan 26-mayda milliy konferensiya o‘tkazilib, unda bolalarni zo‘ravonlikdan himoya qilish bo‘yicha 10 yillik strategiya va harakatlar rejasi taqdim etiladi.
Agentlik matbuot xizmatining xabar qilishicha, “Majburiyatdan harakatga: bolalarga nisbatan zo‘ravonlikka barham berish bo‘yicha strategiya va milliy istiqbollar” nomli konferensiyada BMT, UNICEF, xalqaro tashkilotlar hamda fuqarolik jamiyati institutlari vakillari ishtirok etadi.
“Keling, birgalikda shunday tizim yarataylikki, har bir bola o‘zini himoya ostida, e’tibor va mehr-muhabbat qamrovida his etsin”, deydi Shahnoza Mirziyoyeva
2025-yil 15-maydan boshlab O‘zbekistonda “Bolalarni zo‘ravonlikning barcha shakllaridan himoya qilish to‘g‘risida”gi qonun kuchga kirgandi. Milliy konferensiya qonunni amalga oshirish doirasida o‘tkaziladi.
“Bolalarni zo‘ravonlikning barcha shakllaridan himoya qilish to‘g‘risida”gi qonun 2024-yil 31-mayda Qonunchilik palatasi tomonidan qabul qilinib, 15-avgustda Senat tomonidan ma’qullangandi. U 5 bob va 51 moddadan iborat. Qonunda davlat bolalarni zo‘ravonlikning barcha shakllaridan himoya qilish uchun tegishli huquqiy, ma’muriy, ijtimoiy, iqtisodiy va boshqa choralarni ko‘rishi, zo‘ravonlikdan jabrlanuvchilarni reabilitatsiya qilishi va ularning huquqlarini tiklashi hamda ularni ijtimoiy moslashtirish uchun zarur bo‘lgan samarali choralar ko‘rishi belgilangan.
2025-yil 9-aprelda Toshkentda bolalarni zo‘ravonlikdan himoya qilish bo‘yicha muhim xalqaro muloqot bo‘lib o‘tgandi. Muhokamalar markazida “Bolalarni har qanday zo‘ravonlik shakllaridan himoya qilish to‘g‘risida”gi yangi qonunni joriy etish masalasi bo‘ldi.
Izoh (0)