Toshkent shahri hokimi poytaxtda yo‘l-transport hodisalarining oldini olish uchun 2 milliard 44 million so‘m ajratish to‘g‘risida qaror imzoladi.
20-may kuni imzolangan qarorga ko‘ra, ushbu mablag‘lar yo‘l harakati xavfsizligini ta’minlash ishlari bilan bog‘liq xarajatlarni amalga oshirish uchun tasdiqlangan manzilli ro‘yxatga asosan Toshkent shahrini rivojlantirish jamg‘armasi mablag‘lari hisobidan tuman Obodonlashtirish boshqarmalariga ajratiladi.
Mablag‘ning 1 milliard 460 million so‘mi piyodalar bo‘yicha yo‘l-transport hodisalarining oldini olish maqsadida ko‘cha va yo‘llar bo‘ylab temir panjara o‘rnatish uchun, 588 million so‘mi esa voyaga yetmaganlar o‘rtasida yo‘l-transport hodisalarining oldini olish maqsadida qavariq piyodalar o‘tish joylarini tashkil qilish uchun sarflanadi.
Hujjatga ko‘ra, yo‘llar bo‘ylab jami 5600 metrlik panjaralar o‘rnatiladi. Shundan 1000 metri Olmazor tumanida o‘rnatiladi.
Qavariq piyodalar o‘tish joylari shaharning 42 ta joyida tashkil etiladi. Olmazor tumanida 6 ta, Shayxontohur, Yunusobod, Sergeli, Mirobod tumanlarida 5 tadan, Bektemir tumanida 4 ta, Yashnobod va Chilonzor tumanlarida 3 tadan, Mirzo Ulug‘bek, Yakkasaroy va Yangihayot tumanlarida esa 2 tadan qavariq piyodalar o‘tish joylari tashkil etiladi.
Toshkent shahar hokimining birinchi o‘rinbosari tuman hokimliklari va tuman Obodonlashtirish boshqarmalari bilan birgalikda ajratilgan mablag‘larning o‘rnatilgan tartibda maqsadli sarflanishini ta’minlashi lozim. Ajratilgan mablag‘larning sarflanishi hamda bajarilgan ish hajmi bo‘yicha xalq deputatlari Toshkent shahar Kengashi va Toshkent shahar hokimligiga hisobot berib boriladi.
Izoh (0)