Yozgi transfer oynasi vaqtida Kataloniyaning “Barselona” klubida katta “tozalash” ishlari amalga oshiriladi. Bu haqda Ispaniyaning Relevo nashri xabar berdi.
Manbaga ko‘ra, “ko‘k-anorranglilar” mavsum yakunlangach, bir qancha futbolchilar bilan xayrlashishni rejalashtirmoqda. Klub rahbariyati bu orqali moliyaviy muvozanatni saqlab qolish va tarkibdagi keraksiz futbolchilarni sotib yuborib, ularning o‘rniga boshqa transferlarni amalga oshirishni maqsad qilgan.
Hozircha “Barselona”ning “qora ro‘yxatida” quyidagi futbolchilar ko‘rish mumkin: Ronald Arauxo, Fermin Lopes, Ansu Fati, Erik Garsiya, Andreas Kristensen va Pablo Torre.
Shuningdek, bu ro‘yxat yaqin kunlarda kengayishi mumkin. Xususan, “Barselona” vingeri Ferran Torresga “Aston Villa” klubi jiddiy qiziqish bildirmoqda. Manbaga ko‘ra, Birmingem jamoasi futbolchi uchun 40 million funtdan ko‘proq taklif qilishga tayyor.
Ma’lumot uchun, “Barselona” joriy mavsum ancha samarali o‘yin ko‘rsatmoqda. Klub Ispaniya Superkubogi, Kubogi va La Liga chempionligini qo‘lga kiritdi. Chempionlar Ligasida esa “Inter”ga ikki o‘yin natijasiga ko‘ra, 6:7 hisobida mag‘lub bo‘lib, musobaqa bilan xayrlashdi.
Izoh (0)