“Xalqlar do‘stligi” sanʼat saroyida 10 kunlik konsert dasturini taqdim etayotgan O‘zbekistonda xizmat ko‘rsatgan artist Ozoda Nursaidova klipi syomkasida yuz bergan ko‘ngilsiz hodisaga yana bir bor munosabat bildirdi.
— Hamma narsani boshlagan, o‘sha qizni mashinaga o‘tqizgan odam, men yo‘q edim, men bilmabman deb turibdi. To‘qmoq avvaliga mening boshimda sindi, u esa o‘sha yerdan chapak chalib o‘zini jinniga solib turibdi. Men shunaqa xulosa qildimki, bundan keyin, tayini yo‘q, noproffesional odamlarni hech qachon yaqinimga yo‘latmayman.
— Hech qachon bunaqa o‘lda-jo‘lda, sanʼatga adashib kirib qolgan, na bir kasbini tayini yo‘q, harom-harish odamlarni o‘zimga yaqinlashtirmayman. Biz mana shunaqa odamlarning kasriga qolib ketdik.
15-may kuni Jinoyat ishlari bo‘yicha Mirzo Ulug‘bek tumani sudida Ozoda Nursaidova qo‘shig‘iga klip suratga olinayotganda sodir bo‘lgan mudhish avtohalokatning sud jarayonlari boshlandi.
“Dilbarim” qo‘shig‘iga klip suratga olish jarayonida Sabrina Jabborovani 16 yoshli aktrisa “Gelik”da bosib ketgan edi. Sabrina Toshkent shahrida muvaffaqiyatsiz operatsiya qilingan, shundan so‘ng bir oyog‘i kalta bo‘lib qolgan edi. U o‘zi bilan yuz bergan voqea haqida ijtimoiy tarmoqlarda so‘zlab berganidan keyin ko‘ngillilar tomonidan unga jami 367 million so‘m yig‘ib berilgan edi. Shundan so‘ng aktrisa Istanbul shahrida qaytadan operatsiya qilinib, to‘g‘ri yura boshladi.
Izoh (0)