La Liganing 36-turi doirasida “Malyorka” darvozasiga gol urgan (2:1) “Real” hujumchisi Kilian Mbappe tarixiy natija qayd etdi. Squawka nashrining yozishicha, 26 yoshli fransiyalik futbolchi Madrid klubi tarixida ilk mavsumidayoq 40 marta raqib darvozasini ishg‘ol qilgan ilk futbolchiga aylandi.
Mbappe 28 ta golni La Ligada, 7 tasini Chempionlar Ligasida, 2 tasini Ispaniya Kubogida kiritgan. Shuningdek, u Interkontinental kubogi, Ispaniya Superkubogi va UEFA Superkubogida ham bittadan gol muallifi aylangan.
MisterChip bergan ma’lumotlarga ko‘ra, Mbappe Ispaniya futbolidagi ilk mavsumida 40 yoki undan ortiq gol urgan tarixdagi ikkinchi futbolchi bo‘lgan. Bungacha bunday natijaga faqatgina braziliyalik Ronaldo erishgan — u 1996/97-yilgi mavsum “Barselona” safida 47 ta gol urgan edi.
Qizig‘i, portugaliyalik Krishtianu Ronaldu esa “Real”dagi ilk mavsumida 33 ta gol bilan kifoyalangan. Mbappe allaqachon uni ortda qoldirgan. Endi u braziliyalik afsonaning natijasini yangilashga harakat qiladi. Ammo mavsum tugashiga 3 tur qolganini hisobga olsak, bu Mbappe uchun qiyinroq bo‘lishi mumkin.
Ma’lumot uchun, La Liganing 36-turi doirasidagi “Real” — “Malyorka” uchrashuvida madridliklar 2:1 hisobida g‘alaba qozondi. Karlo Anchelotti jamoasi hozir onlayn turnir jadvalida 78 ochko bilan 2-o‘rinni egallab turibdi. Ular asosiy raqobatchisi “Barselona”dan bitta ko‘p o‘yin o‘tkazgan holda 5 ochkoga ortda qolmoqda.
Izoh (0)