Mavritaniya sudi mamlakatning sobiq prezidenti Muhammad al-Abdulazizni korrupsiya ishi bo‘yicha 15 yillik qamoq jazosiga hukm qildi. Bu haqda Sahara Medias nashri xabar bermoqda.
2023-yil dekabrida Abdulaziz pul yuvish va noqonuniy boylik orttirish ayblovi bilan besh yilga ozodlikdan mahrum etilgan edi. Mavritaniyaning sobiq prezidenti bu qaror ustidan apellyatsiya bergan. 14-may kuni Abdulaziz va uning bir nechta yordamchilari ishtirok etgan apellyatsiya sudi majlisi bo‘lib o‘tdi.
“Apellyatsiya sudining jinoyat ishlari bo‘yicha palatasi chorshanba kuni sobiq prezident Muhammad al-Abdulazizni 15 yillik qamoq jazosiga hukm qildi”, deyiladi nashr xabarida.
Shuningdek, sud sobiq prezidentning kuyoviga ham ikki yillik qamoq jazosi tayinlagan.
“Sobiq prezidentning himoya guruhi hukm ustidan Oliy sudga shikoyat qilishi kutilmoqda”, deb yozadi nashr.
Muhammad al-Abdulaziz 2009-2019 yillarda Mavritaniya prezidenti bo‘lgan. Unga qarshi tergov 2020-yilda boshlangan bo‘lib, mamlakatning sobiq rahbariga hokimiyat va xizmat mavqeyini suiiste’mol qilish hamda daromadlarni yashirish kabi bir nechta moddalar bo‘yicha ayblov qo‘yilgan.
2023-yilning dekabrida sobiq prezident besh yillik qamoq jazosiga hukm qilingan edi. Apellyatsiyani ko‘rib chiqish 2024-yil 13-noyabrda boshlangan.
Qo‘shimcha qilinishicha, sud Abdulazizning mol-mulkini musodara qilish va uni fuqarolik huquqlaridan mahrum etish to‘g‘risidagi qarorni ham o‘z kuchida qoldirgan.
1978-yildan 2008-yilgacha Mavritaniya bir nechta davlat to‘ntarishlarini boshdan kechirgan. 2019-yilda ilk bor saylovlar natijasida hokimiyat bir prezidentdan boshqasiga o‘tgan. O‘shanda ovoz berishda hozirgi kunda ham hokimiyat tepasida turgan Muhammad al-G‘azvoniy g‘alaba qozongan edi.
Tbilisi shahar sudi Gruziya sobiq prezidenti Mixail Saakashvilini davlat mablag‘larini o‘ta yirik miqdorda o‘zlashtirishda aybdor deb topdi va uni to‘qqiz yilga ozodlikdan mahrum qilgandi.
Izoh (0)