Ko‘plab aktrisa va qo‘shiqchilar aslida shuhrat va e’tiborni izlamaydi. Aksincha, ular omma bilan muloqotdan va e’tibordan tezda charchashadi. Shunga qaramay, ular muvaffaqiyatli karyera qurishga, gastrollarda ishtirok etishga va sahnada chiqish qilishga erishadi. Ular shaxsiy hayot va sahnadagi faoliyat orasida qanday muvozanat topayotganlarini ushbu maqolada bilib olasiz.
Billi Aylish: Gastrollar — hissiy sinov
23 yoshli qo‘shiqchi Billi Aylish samolyotda uchishni, vaqtlardagi tafovutni va atrofida ko‘p odam bo‘lishini yomon ko‘radi. Har bir gastrol safari xonanda uchun juda qiyin kechadi. U hatto gastrollardan shu darajada charchaganidan sochini qirdirib tashlashni o‘ylaganini tan olgan. Uni faqat o‘z vaqtida boshlagan terapiya qutqardi.
Billi energiyasini muloqot, qisqa konsertlar va tashqi dunyodan vaqti-vaqti bilan chekinish orqali tiklaydi. U kun tartibini o‘zi tuzadi, ommaviy muloqotni kamaytiradi va haddan tashqari ashaddiy muxlislar haqida ochiq-oydin gapirishdan tortinmaydi.
Uch soatlik konsertga qanday chidashadi? Bu haqiqiy tentaklikku, deydi u.
Zendaya: Moda ortiga yashirilgan uyatchanlik
Zendaya bolaligida juda tortinchoq edi. Hatto ota-onasi uni bog‘chada yana bir yil qoldirishga majbur bo‘lgan. Keyinchalik, ular qizining o‘ziga bo‘lgan ishonchini oshirish uchun modellikka olib borishgan.
Jamoat oldida bo‘lish model uchun ham sinov, ham terapiyaga aylandi.
Men modani o‘zimga qalqon qilib olgandim. Ko‘chada yurganimda o‘zimni g‘alati his qilsamda, lekin bu kerakligini bilardim, ta’kidladi u.
Zendaya ommaviy chiqishlarda o‘ziga ishonchsizlikni yengish uchun loqayd va mag‘rur ko‘rinishga harakat qilgan. Bu esa uni boshqalar ko‘zida “kibrli” qilib ko‘rsatgan.
Bugungi kunda Zendaya butun dunyo bo‘ylab millionlab muxlislarga ega. Ammo xavotir va tortinchoqlik hali ham uning hamrohi. Hattoki oddiy ijtimoiy tarmoq posti ham unda xavotir uyg‘otadi.
Adel: Sahna qo‘rquvi va uni yengish yo‘li
Britaniyalik xonanda Adel 15 ta “Gremmi” mukofotiga sazovor bo‘lgan, ammo hanuzgacha sahnaga chiqishdan qattiq qo‘rqadi. Adel go‘yoki tomoshabinlar uni haqiqiy hayotdagidek emas, boshqacha tasavvur qiladi, uning tashqi ko‘rinishidan, jonli ijrosidan hafsalasi pir bo‘ladi va masxara qiladi deb o‘ylaydi. Sahnaga chiqish arafasida u o‘zini yomon his qiladi, hatto sahnadan chiqib ketishni xohlaydi. Ammo musiqaning ilk ohanglari yangragan zahoti bu hislar yo‘qoladi.
Adel bolaligidan bezovtalik va depressiya bilan kurashgan. Bu holatlar ko‘p marotaba mutaxassislarga murojaat qilishiga sabab bo'lgan. U o‘z prinsiplariga qarshi borib, tomoshabinlar uchun kiborli yulduz bo‘lishni xohlamaydi. Aksincha, u tez orada karyerasini yakunlab, tabiiy qo‘ynida joyashgan kichik uyida yolg‘iz qolishni orzu qiladi.
Introvert — Lana Del Rey
“Video Games” va boshqa mashhur qo‘shiqlar ijrochisi Lana bolaligidan o‘ta ta’sirchan bo‘lgan. Oddiy holatlar ham unga fojia bo‘lib tuyulgan. U o‘limdan, akulalardan qo‘rqqan, Santa-Klaus yo‘qligini bilib, ruhiy zarba olgan. Dunyo shafqatsizligidan o‘zini himoya qilish uchun yolg‘izlikka cho‘mgan.
Men introvertman, tinchlik — ijod va dam olish uchun kerak, degan u intervyularidan birida.
U asta-sekin ommaviy e’tiborga o‘rganishga harakat qilgan. Ammo ko‘p odamlar bilan muloqot hanuzgacha unga noqulaylik tug‘diradi. Shu sababli, uning birinchi albomi bir necha yil javonda chang bosib yotgan. Lana uni reklamasiz “o‘z-o‘zidan mashhur bo‘lib ketar” deb kutgan. Keyin esa do‘stlari bilan birga kliplar suratga olib, YouTube kanaliga joylashtirgan.
U uchun ideal holat — sukunat, gitara va yaqin inson bilan birga bo‘lish. Shuning uchun mashhurlikni ham bu hayot tarziga almashtirishdan cho‘chimaydi.
Shaylin Vudli: Karyera va sukut o‘rtasidagi muvozanat
COVID-19 pandemiyasi davrida dunyo izolyatsiyaga tushganda, Shaylin bu holatdan rostdan ham zavq olgan kam sonli insonlardan biri bo‘lgan. Endi boshqa qit’alarga uchish, begona odamlarga to‘la samolyotlarda soatlab o‘tirish, muloqot qilish shart emas edi. Aktrisa o‘zini “kvadrat introvert” deb ataydi. U mashhurlik bilan bog‘liq hamma narsadan juda charchaydi.
Lekin Shaylin kino olamida jiddiy karyera qilish uchun muloqot zarurligini tushunadi. Shu sababli, o‘zini ekstrovertdek tutadi, ammo keyin o‘zini “siqilgan limon”dek his qiladi. Shu sababli u vaqti-vaqti bilan uyiga qamalib oladi va faqat iti bilan gaplashadi.
Introvertlik va shuhrat bir-biriga zid emas. Ushbu yulduzlar muvaffaqiyatni hatto ortiqcha ta’sirchanlik va yolg‘izlikka bo‘lgan ehtiyoj bilan ham erishish mumkinligini isbotlaydi. Eng muhimi o‘z ovozingizga quloq tutish, jamoat hayoti va dam olish o‘rtasidagi muvozanatni topish va o‘z holatingiz haqida ochiq gapirishdan qo‘rqmaslik.
Izoh (0)