Germaniya terma jamoasi va Leverkuzenning “Bayer” klubi hujumkor yarim himoyachisi Florian Virts Angliyaga yo‘l olishi mumkin. Bu haqda Sky Sports nashri xabar berdi.
Unga “Manchester Siti” jiddiy qiziqish bildirmoqda. Klub ustozi Pep Gvardiola futbolchini jamoaga olib kelishni istamoqda va uni kelajakdagi rejalarining bir qismi sifatida ko‘rmoqda. Shu bois “shaharliklar” rahbariyati ortga chekinishni istamayapti. Ma’lumotlarga ko‘ra, klub vakillari allaqachon “Bayer” bilan muzokaralar o‘tkazgan va tomonlar o‘rtasida og‘zaki kelishuvga erishilgan.
Virtsning leverkuzenliklar bilan tuzgan amaldagi shartnomasi 2027-yilgacha mo‘ljallangan. Transfermarkt portali uning qiymatini 140 million yevroga baholamoqda.
Florian joriy mavsum Bundesliga doirasidagi 30 ta o‘yinda maydonga tushib, o‘z hisobiga 10 ta gol va 12 ta golli uzatma yozdirib qo‘ygan.
Avvalroq OAVda futbolchining oila a’zolari Virtsni Germaniyaning boshqa jamoasi — “Bavariya”ga o‘tishi tarafdori ekanligi borasida xabarlar tarqalgan edi. Shuningdek, unga Madridning “Real” klubidan ham takliflar borligi aytilgandi.
Izoh (0)