Makadamiya dunyodagi eng qimmat yong‘oqlardan biri hisoblanadi. U yumshoq bo‘lib, qaymoq va vanilga o‘xshash ta’mga ega. Tarkibida foydali moddalar juda ko‘p. Agar uni to‘g‘ri tanlab, qattiq po‘stlog‘ini qanday ajratishni bilsangiz, makadamiya sog‘liq uchun juda foydali mahsulot bo‘la oladi. Quyida bu yong‘oqni nima uchun ratsionga qo‘shish kerakligi va undan qanday foydalanish haqida ma’lumot beriladi.
Makadamiyaning foydali tarkibi
• Foydali yog‘lar. Makadamiya tarkibining qariyb 75 foizi to‘yingan yog‘ kislotalaridan iborat. Bu jihatdan u zaytun yog‘iga o‘xshaydi. Ular yurak-qon tomir salomatligini qo‘llab-quvvatlaydi va “yomon” xolesterin darajasini pasaytiradi.
• Oqsil va kletchatka. Bu yong‘oq uzoq vaqt to‘qlik hissini beradi va ovqat hazm qilishni yaxshilaydi.
• Vitamin va minerallar. Makadamiya E va B guruhi vitaminlari, magniy, kaliy, temir va ruxga boy. Ular asab tizimini tinchlantiradi, immunitetni mustahkamlaydi va teri holatini yaxshilaydi.
• Antioksidantlar. Ushbu yong‘oqni muntazam iste’mol qilish yallig‘lanishlarga qarshi kurashish va qarish jarayonini sekinlashtiradi.
Eslatma: Makadamiya yong‘og‘i yuqori kaloriyali mahsulot hisoblanadi. Uning 100 grammida taxminan 720 kkal bor. Shuning uchun yong‘oqni me’yorida iste’mol qilish kerak. Kuniga 5–7 dona yetarli bo‘ladi.
Qanday makadamiyani tanlash kerak?
Yong‘oq xarid qilayotganda quyidagilarga e’tibor bering:
• Butunligi. Qobig‘i bilan bo‘lgan butun yong‘oqlar o‘zining ta’mi va foydali xossalarini yaxshi saqlaydi. Tozalangan bo‘lsa, silliq, dog‘siz, yoriqsiz bo‘lishi kerak.
• Rangi. Yong‘oq yadrochasi och sarg‘ish krem rangda, bir xil bo‘lishi kerak. Qoraygan, sarg‘aygan yoki yoqimsiz hidli yong‘oqlar sifatsiz hisoblanadi.
• Qadoqlanishi. Havo o‘tkazmaydigan yoki vakuumli qadoqdagi yong‘oqlarni tanlang — ular havoda kamroq oksidlanadi.
• Tarkibi. Agar qovurilgan makadamiya olayotgan bo‘lsangiz, tarkibiga qarang: tuz, shakar yoki sun’iy qo‘shimchalarsiz variantni tanlang.
Makadamiyani qanday chaqish kerak?
Makadamiyaning po‘stlog‘i juda qattiq. Uni chaqish uchun maxsus moslamalar kerak bo‘ladi.
Agar yong‘oq oldindan yorilgan bo‘lsa, ish osonlashadi. Odatda bunday yong‘oqlarga kichik metall kalitcha qo‘shib beriladi. Uni yorilgan joyiga kirgizib, burasangiz, po‘stloq ochiladi.
Agar yong‘oqda hech qanday yoriq bo‘lmasa, kuchli yong‘oq yoruvchi moslama yoki qisqich kerak bo‘ladi. Ba’zan bolg‘a ham ishlatiladi, lekin ehtiyot bo‘lish zarur — yong‘oqni ezib yubormaslik kerak.
Eng qulayi — oldindan chaqilgan yoki tozalangan makadamiya sotib olish.
Izoh (0)