“Barselona” va Ispaniya terma jamoasining sobiq hujumchisi David Vilya “ko‘k-anorranglilar”ning yosh yulduzi Lamin Yamal haqida iliq fikr bildirdi.
Uning fikricha, futbolchi joriy mavsum ko‘rsatayotgan o‘yini uchun “Oltin to‘p”ni qo‘lga kiritishga loyiq:
Yamal bizni hayron qoldirishda davom etaveradi. Ayniqsa, “Inter”ga qarshi o‘yinning so‘nggi daqiqalarida barcha jamoadoshlari uni izlayotgandek tuyildi, go‘yoki ular aynan Yamal o‘yinni hal qila olishini bilishardi. Tasavvur qiling, 17 yoshli futbolchiga barcha ishonmoqda. Boshqa klublarga hurmat saqlagan holda aytish kerakki, “Barselona”da o‘ynash nihoyatda murakkab. Bu klubning o‘ziga xos aurasi bor. “Oltin to‘p”mi? Ko‘ramiz. Men bu mukofotga ko‘p ham ishonmayman. Ammo Lamin tan olinishga loyiq ish qilmoqda. Mavsum hali yakunlanmadi. Shunday bo‘lsa-da, men ishonamanki, u bir kuni bu sovrinni albatta qo‘lga kiritadi, dedi Vilya Mundo Deportivo nashriga bergan intervyusida.
Ma’lumot uchun, Transfermarkt portali hozirda Yamalning transfer qiymatini 180 million yevroga baholamoqda. Futbolchi joriy mavsum La Liga doirasidagi 32 uchrashuvda maydonga tushib, o‘z hisobida 7 ta gol va 12 ta golli uzatma yozdirib qo‘ygan.
Izoh (0)