“PSJ” va Kilian Mbappe o‘rtasidagi mojaro davom etmoqda. Kecha, 12-may kuni parijliklar sudga murojaat qilib, hujumchi tomonidan talab qilinayotgan 55 million yevro miqdoridagi summani to‘lamasligini ma’lum qilgan. Bu haqda RMC Sport xabar berdi.
Mojaro sud orqali hal qilinmoqda. Manbaga ko‘ra, 2025-yil aprel oyi boshlarida Mbappe klubdan 55 million yevro miqdoridagi to‘lanmagan maosh va bonuslarni undirish uchun sudga murojaat qilgan. Biroq, “PSJ” bu da’voni asossiz deb atadi va aksincha, futbolchi klubdan qarzdor ekanini bildirdi.
12-may kungi sud majlisida parijliklarning advokati Mbappe yetarli dalil keltirmaganini ta’kidladi. Klub vakillari futbolchi 2023-yil yozida “PSJ” bilan og‘zaki kelishuvga erishganini aytishmoqda. Unga ko‘ra, agar Mbappe erkin agent sifatida jamoani tark etsa, u shartnoma ko‘rsatilgan ayrim to‘lovlardan voz kechishi kerak edi.
“PSJ” ushbu holat yuzasidan 98 million yevrolik qarshi da’vo arizasini ham kiritdi. Klub vakillari bayonotida shunday deyilgan:
Kilian Mbappe jamoaning obro‘siga putur yetkazgan. U Parijdan ketgach, ko‘plab gap-so‘zlar tarqalgan hamda bu klubga ma’naviy zarar yetkazgan. Shuning uchun u “PSJ” klubidan qarzdor. Biz bu da’vo orqali 98 million yevroni qaytarib olishni emas, balki uning talabi asossizligini ko‘rsatishni maqsad qilganmiz.
Mazkur mojaro hozircha o‘z yakuniga yetgani yo‘q. Yakuniy sud qarori yaqin kunlarda e’lon qilinishi aytilmoqda.
Izoh (0)