O‘zbekistonda ahil oilalar hamda yosh kelin-kuyovlar ishtirokida “Oilalar sayli” o‘tkazilishi ma’lum qilindi.
“Farovon oila sari” oyligi doirasida Xalqaro oila kuni (15-may) munosabati bilan qator tadbirlar tashkil etilishi rejalashtirilgan. Oila va xotin-qizlar qo‘mitasi boshqarma boshlig‘i Mavluda Nizomovaning brifingda ma’lum qilishicha, “Ibratli oila” ko‘krak nishoni bilan taqdirlash yuzasidan takliflarni ko‘rib chiqish bo‘yicha 40 nafar vazirlik va idoralar vakillaridan iborat komissiya tuzilgan.
Hududiy komissiyalar, vazirlik va idoralar tomonidan 5 500 dan ortiq oilaning hujjatlari ushbu ko‘krak nishoniga tavsiya etilgan. Nomzod oilalar soni o‘tgan yilga nisbatan 8,8 baravarga oshgan. Mazkur oilalar 40 nafardan ortiq faol va ekspertlar tomonidan o‘rganilib, 2 000 ta oila “Ibratli oila” ko‘krak nishoni bilan taqdirlash uchun saralab olingan.
Bundan tashqari, joriy yilda vazirlik va idoralardan ham nomzodlar tavsiya etilishi so‘ralgan bo‘lib, ular tomonidan ko‘rsatilgan 77 ta oila ham nishon bilan taqdirlanishi belgilangan.
15-may — Xalqaro oila kuni arafasida bo‘lib o‘tadigan tantanali marosimlarda ushbu oilalarga “Ibratli oila” ko‘krak nishoni hamda pul mukofotlari topshiriladi. Shuningdek, ularning yashash joylaridagi uylarning kirish qismiga faxrli belgilar o‘rnatiladi.
Shu bilan birga, mahallalarda 4 milliondan ortiq xotin-qizlarni ommaviy sport tadbirlariga jalb qilish ishlari davom ettiriladi. “Sog‘lom oila uchun birlashaylik!” sport marafoni, “Sport sayli” kabi ommaviy jismoniy faollik tadbirlari o‘tkazilishi rejalashtirilgan.
Mazkur oylik doirasida eng muhim tadbirlardan biri sifatida 15-may kuni respublikaning barcha tuman va shahar markazlaridagi istirohat bog‘larida “Ibratli oila” ko‘krak nishoni sohibalari, ahil oilalar hamda yosh kelin-kuyovlar ishtirokida “Oilalar sayli” — Oilafest tashkil etiladi.
Qayd etilishicha, tadbirlar oilaviy qadriyatlarni mustahkamlash, sog‘lom turmush tarzini targ‘ib etish va jamiyatda oila institutining nufuzini yanada oshirishga xizmat qiladi.
Oilaviy zo‘ravonlikdan jabrlangan shaxs talabiga ko‘ra nikohdan ajrashayotganda muhlat tayinlanmasligi xabar qilingandi. Shuningdek, 21-fevral kuni Senatning to‘rtinchi yalpi majlisida “Oila va xotin-qizlarni qo‘llab-quvvatlash tizimi takomillashtirilishi munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida”gi qonun maʼqullangandi.
Izoh (0)