Madridning “Real” klubi safida ikkinchi mavsumini o‘tkazayotgan turkiyalik futbolchi Arda Gyuler jamoaga yangi kelganida yuz bergan qiziqarli voqeani so‘zlab berdi.
Ardaning aytishicha, “qirollik klubi” a’zolari uni juda yaxshi kutib olishgan va unga “abi” ya’ni aka laqabini berishgan:
“Real”ga kelganimda David Alaba va Antonio Ryudiger biroz turk tilini tushunisharkan. Ular yoshligidan Berlin va Venada turk muhojirlar orasida ulg‘ayishgan. Hatto Alaba “Galatasaray”ning ashaddiy muxlisi ekanligidan xabar topdim. Tibo Kurtua esa Arda Turan bilan bir jamoada to‘p surgan, shuning uchun u ham turk tilidan ba’zi — asosan yomon so’zlarni biladi, deydi Arda.
Ammo voqeaning eng qiziq joyi oldinda edi. Gyuler turk odatlariga ko‘ra, kattalarga hurmat bilan “abi” ya’ni “aka” deb murojaat qiladi. “Real” afsonasi Luka Modrich bilan ilk uchrashuvda: “Salom, Luka abi,” degan.
Modrich otam yoshidagi odam. Uni oddiy “Luka” deb chaqira olmasdim. Shuning uchun “Luka abi” dedim, deydi Arda.
Bu so‘zlarni eshitgan Alaba va Ryudiger esa “abi” hammani chaqirish uchun ishlatiladi deb o‘ylagan va keyingi kunlar mashg‘ulot maydonida Gyulerni “xayrli tong, abi” deb kutib olishgan. Shundan beri turkiyalik futbolchining laqabi Arda abi bo‘lib qolgan.
Endi kech. Hozir men “rasmiy” ravishda “Real”dagi eng yoshi katta futbolchi — Arda abiman, deya eslaydi yosh futbolchi.
Izoh (0)