Andijon viloyatining Buloqboshi tumanida 8-may kuni Farg‘ona kanali qirg‘og‘i o‘pirilib, suv toshib chiqqandi. Suv xo‘jaligi vazirligi holat yuzasidan bayonot berdi.
Unda keltirilishicha, 8-may kuni soat 8:00 larda Andijon viloyatidan oqib o‘tuvchi Janubiy Farg‘ona magistral kanalining PK-194+60 piketida kichik GES qurish ishlarini olib borish jarayonida kanalning dambasini suv yuvib ketgan.
Vazirlik topshirig‘iga ko‘ra, vaziyatni o‘rganish va zaruratga ko‘ra tegishli tadbirlarni amalga oshirish uchun “Norin—Qoradaryo” irrigatsiya tizimlari havza boshqarmasi boshlig‘i, “Suvxo‘jaliknazorat” inspeksiyasi rahbari, inspeksiyaning Andijon viloyat boshqarmasi boshlig‘i, Farg‘ona magistral kanallardan foydalanish boshqarmasi boshlig‘i hamda tegishli idoralarning vakillaridan iborat tarkibda ishchi guruhi tuzilgan va ular zudlik bilan voqea joyiga yetib borgan.
Elektr energiyasi ishlab chiqarishni yo‘lga qo‘yish uchun kanalning PK-194+60 piketida “Gidroproekt” MChJ loyihasi asosida “Gidroqurilish buyurtmachi xizmati” MChJ buyurtmasi bilan GES qurish ishlari olib borilmoqda. Ishchi guruhining aniqlashicha, ushbu piketda kanalning loyihaviy suv o‘tkazish qobiliyati 80 m3/sekund bo‘lib, holat yuzaga kelgan vaqtda kanaldan 60 m3/sekund suv o‘tib turgan.
Favqulodda vaziyatni bartaraf etish uchun Andijon suv omboridan suv chiqishi to‘xtatildi. Hozirda kanalda 30 m3/sek suv qolgan bo‘lib, soat 14:00 gacha to‘liq to‘xtatildi. Kanaldagi o‘tgan suv Quyi Janubiy Farg‘ona kanaliga yo‘naltirildi. Hozirda aholi xonadonlariga suv oqishini kamaytirish choralari ko‘rilmoqda.
Kanal dambasini tiklash bo‘yicha shtab tashkil etilib, rahbar xodimlardan iborat doimiy navbatchilik yo‘lga qo‘yildi. Favqulodda vaziyatni bartaraf etish uchun 10 ta samosval, 4 ta kara, 2 ta buldozer, 8 ta ekskavator va 50 dan ortiq ishchi-xodimlar jalb qilindi.
Hodisa oqibatida yon-atrofdagi mahallalarni suv bosgandi. “O‘zgidromet” birlamchi axborotida 560 ta xonadonni suv bosgani xabar qilingandi. Keyinroq FVV 100 taga yaqin xonadonlarga suv kirgani, shundan 30 xonadon ichiga, 70 ta xonadon tomorqasiga suv kirganini ma’lum qildi.
“O‘zbekgidroenergo” hudud aholisini ortiqcha vahimaga berilmaslikka va xotirjamlikka chaqirdi. Andijon viloyati hokimligi matbuot xizmati viloyat hokimi boshchiligidagi mutasaddi tashkilotlar ishtirokida ishchi guruh tuzilib, holat bartaraf etilayotganini bildirdi.
Izoh (0)