Ural Airlines aviakompaniyasining Qarshi—Moskva reysi texnik sabablarga ko‘ra bekor qilindi. Bu haqda Uzbekistan Airports xabar berdi.
Unga ko‘ra, bortida 154 nafar yo‘lovchi bo‘lgan Rossiyaning Ural Airlines aviakompaniyasining Qarshi—Moskva yo‘nalishi bo‘yicha U62128 reysi 14-aprel kuni mahalliy vaqt bilan soat 05:35 da havoga ko‘tarilishi kerak edi. Ma’lum qilinishicha, ushbu reys texnik sabablarga ko‘ra bekor qilingan. Ammo tashkilot samolyotda aynan qanday texnik nosozlik kuzatilganini ochiqlamagan.
Ayni damda ushbu reys yo‘lovchilari mehmonxonaga joylashtirildi. Dastlabki ma’lumotlarga ko‘ra, yo‘lovchilar Ural Airlines’ning boshqa reyslarida o‘z manziliga jo‘natiladi.
Parvoz holati haqida batafsil ma’lumot olish uchun aviakompaniya vakiliga murojaat qilish mumkinligi aytildi.
Bundan avval O‘zbekistondan Moskvaga uchgan ikki aviareys boshqa aeroportlarga yo‘naltirilgani haqida xabar berilgandi. Shuningdek, havo kemasining kech kelishi munosabati bilan Toshkent—Antaliya—Toshkent HY3223/3224 yo‘nalishi bo‘yicha parvoz o‘zgartirilgan jadval bo‘yicha amalga oshirilgani haqida xabar berilgandi.
Izoh (0)