Ko‘pchilik shirinliklar sog‘liq uchun dushman ekanligi rost, ammo ba’zi shirin ta’mli mahsulotlar tanaga foyda keltirishi, hatto yurak-qon tomir sog‘ligiga ijobiy ta’sir ko‘rsatishi mumkin. Muhimi — to‘g‘ri tanlov qila olish. Quyida foydali desertlar va organizmni mustahkamlovchi shirinliklar haqida ma’lumot beramiz.
-_FLgFr52.avif)
Kundalik shirinlik o‘rnida tabiiy mahsulotlar — olma, banan, turli rezavor mevalarni iste’mol qilish tavsiya etiladi. Bu mevalar o‘ziga xos tabiiy shirin ta’mga ega bo‘lib, vitamin va antioksidantlarga nihoyatda boy. Ular organizmni mustahkamlab, immunitetni ko‘tarishda muhim rol o‘ynaydi.
Uy sharoitida tayyorlanadigan desertlar tarkibiga esa mayiz qo‘shish ayni muddao. Mayiz yurak faoliyatini qo‘llab-quvvatlovchi kaliyga boy bo‘lib, undagi tolalar ovqat hazm qilishni yaxshilaydi. Shuningdek, temir moddasi miqdorining yuqoriligi sababli u kamqonlikning oldini olishda samarali vosita hisoblanadi.
Yosh ulg‘aygani sayin, ayniqsa 50 yoshdan keyin, kundalik ratsiondan shakarni chiqarib tashlash sog‘liq uchun katta foyda keltiradi. Buning natijasida yurak-qon tomir tizimi faoliyati yaxshilanadi, teri holati tiklanadi, qon bosimi me’yorlashadi, shakar miqdori muvozanatga keladi. Eng muhimi, miyaning ishlash faoliyati kuchayadi, fikrlash ravshanlashadi.
Shakar iste’molini kamaytirish shirinliklardan butunlay voz kechish degani emas. Aksincha, foydali va tabiiy desertlar bilan ovqatlanish madaniyatini shakllantirish muhim. Misol uchun, agar-agardan tayyorlangan zefir (u dengiz suvo‘tlaridan olinadi) eng yaxshi alternativalardan biri. Yong‘oq bilan boyitilgan mevali salatlar, qora shokolad, shakarsiz myusli batonchiklari, uy sharoitida tayyorlangan, meva hamda rezavorlar bilan boyitilgan yogurt — barchasi nafaqat shirin, balki foydali hamdir.
Albatta, xalqimiz sevib iste’mol qiladigan holvani ham alohida ta’kidlash lozim. Uning tarkibidagi tabiiy yog‘lar, vitamin va minerallar yurak-qon tomir tizimi faoliyatini yaxshilaydi, organizmga energiya beradi, tish va suyaklarni mustahkamlaydi. Ayniqsa, undagi B guruhi vitaminlari asab tizimini tinchlantirishda va stressni yengishda katta yordam beradi.
Izoh (0)