“Paxtakor” klubi prezidenti maslahatchisi Maksim Shatskix Qozog‘iston nashriga bergan intervyusida “Turon” safida porlayotgan o‘zbekistonlik yarim himoyachi Behruz Asqarov haqida fikr bildirdi.
22 yoshli Asqarov yaqinda “Qiziljar”ga qarshi o‘yinda zaxiradan maydonga tushib, gol va assist muallifi bo‘ldi. Shuningdek, “Atirau”ga qarshi Qozog‘iston Kubogi uchrashuvida ham golli uzatma berdi. Uning o‘yini nafaqat Qozog‘istonda, balki O‘zbekistonda ham katta eʼtibor qozonmoqda. Hatto uni kelajakdagi Husanov deb atayotganlar bor.
Biroq Shatskix bu taqqoslashga qo‘shilmaydi:
Husanov va Asqarov butunlay boshqacha futbolchilar. Ular pozitsiyasi, jismoniy holati va texnik jihatdan farq qiladi. Men Behruzni yaxshi bilaman. Juda yaxshi bola, tartibli va isteʼdodli. “Paxtakor”da u ko‘p vaqt o‘ynamagan, sababi raqobat kuchli edi, qolaversa, u tez-tez terma jamoada bo‘lardi.
Murabbiy unga bir nechta pozitsiyada imkon berganini ham aytib o‘tdi:
Asqarovni himoyaning turli nuqtalarida ham sinab ko‘rganman — tayanch zonasi, chap va o‘ng qanot himoyachisi sifatida ham. U barcha topshiriqlarni sifatli bajargan.
Shatskix Asqarovning intellektual darajasi yuqori baholadi:
Futbol — bu birinchi navbatda aql sporti. Behruzda bu bor. Unga faqat ko‘proq o‘yin amaliyoti kerak. Potensiali katta. Balki birinchi bosqichdayoq “Manchester Siti”ga o‘ta olmas, lekin u kuchli jamoada o‘ynashga qodir futbolchi hisoblanadi.
Ma’lumot uchun, Behruz Asqarov qishki transfer oynasi paytida “Paxtakor”dan Qozog‘istonning “Turon” klubiga ijara asosida ko‘chib o‘tgan edi. U O‘zbekistonning turli yosh toifasidagi terma jamoalari safida o‘ynagan. Hozirda O‘zbekiston U-23 jamoasining asosiy tarkib futbolchisi hisoblanadi.
Izoh (0)