Xitoyda aholini oila qurishga rag‘batlantirish maqsadida nikoh tuzish tartibi soddalashtirildi. Bu haqda Sinxua xabar berdi.
Ma’lum qilinishicha, yangi qoidalar hujjatlarni topshirishni osonlashtiradi. Endi nikoh uchun quyidagi hujjatlargina yetarli bo‘ladi:
- shaxsni tasdiqlovchi hujjat;
- amaldagi nikoh mavjud emasligi to‘g‘risidagi arizalar;
- so‘nggi uch avlodda yaqin qarindoshlik aloqalari yo‘qligi to‘g‘risidagi arizalar.
Bungacha juftliklar uy xo‘jaligi ro‘yxatiga oid kitoblarni ham taqdim etishi kerak edi. Endi esa Xitoy fuqarolari faqat yashash joyi bo‘yicha emas, balki istagan joyda nikohdan o‘tishi mumkin. Ushbu o‘zgarishlar 2025-yil 10-maydan kuchga kiradi. Nikoh tuzish qoidalari mamlakatda 2003-yildan beri o‘zgarmagan edi.
Rasmiylar yangiliklar vaqtni tejash va oila qurish xarajatlarini kamaytirishiga ishonadi. Chunki ko‘plab fuqarolar doimiy ro‘yxatdan o‘tgan manzilidan (propiska) uzoqda yashaydi va ishlaydi. Ko‘plab xitoyliklar o‘z ona shahriga bormaslik uchun to‘ydan bosh tortadi.
Shuningdek, mutaxassislar to‘ylarning kamayishini nikoh yoshidagi aholi sonining kamayishi, munosabatlarga bo‘lgan qarashlarning o‘zgarishi va oila qurish bilan bog‘liq xarajatlarning oshishi bilan bog‘lamoqda.
Xitoyda tug‘ilish ko‘rsatkichi keskin pasaygan
Xitoyda tug‘ilish darajasini oshirish kampaniyasi boshlandi, u nikohni rag‘batlantirish va oilalarda bolalar sonini ko‘paytirishga qaratilgan bo‘lib, turli jabhalarni qamrab oladi.
Mahalliy hokimiyat organlari turmush qurgan ayollarga qo‘ng‘iroq qilib, ularning farzand ko‘rish rejalari bilan qiziqmoqda. Ayollar salomatligini tekshirish uchun ular konsultatsiyalarga taklif qilinadi. Bir yoki undan ortiq bolasi bor oilalar uchun yana bir bola tug‘ilishini rag‘batlantiruvchi maxsus nafaqalar nazarda tutilgan.
Bundan tashqari, Xitoydagi universitetlar nikoh va sevgi masalalariga bag‘ishlangan maxsus kurslarni joriy etishi shart. Ushbu kurslar yolg‘iz talabalarga mo‘ljallangan bo‘lib, ularga kelajakda mamlakatda tug‘ilish darajasining oshishiga hissa qo‘shishi mumkin bo‘lgan munosabatlarni o‘rnatishda yordam beradi.
Izoh (0)