Libertadores Kubogi doirasidagi “Kolo Kolo” va “Fortaleza” o‘rtasidagi uchrashuv oldidan fojia yuz berdi. Bu haqda Sport-Express nashri xabar berdi.
Santiago shahridagi “Monumental” stadionida o‘yin boshlanishidan avval muxlislar ichkariga kuch bilan kirishga uringan. Bu holatda to‘siqlardan biri qulab tushib, uning ostida qolgan ikki kishi halok bo‘ldi: ulardan biri voqea joyida, ikkinchisi esa shifoxonada hayotdan ko‘z yumdi.
Fojiali hodisaga qaramay, o‘yin o‘z vaqtida boshlandi. Biroq, 70-daqiqada muxlislarning stadionga turli buyumlarni otgani sababli bahs vaqtincha to‘xtatildi.
Janubiy Amerika Futbol Konfederatsiyasi – KONMEBOL ushbu voqea yuzasidan chuqur afsus bildirar ekan, halok bo‘lganlarning oila a’zolari va yaqinlariga hamdardlik yo‘lladi.
Ta’kidlash joiz, “Kolo Kolo” hozirgi Chili chempioni sanaladi. “Fortaleza” esa o‘tgan mavsumda Braziliya chempionatini to‘rtinchi o‘rinda yakunlagan.
Izoh (0)