“Barselona” hujumchisi Robert Levandovski UEFA Chempionlar Ligasi chorak final bosqichida “Borussiya Dortmund” darvozasiga 2 ta gol kiritib, dubl muallifiga aylandi. Bu natija orqali polshalik forvard o‘ziga xos natija qayd etdi.
Opta Sport xabariga ko‘ra, 36 yoshli futbolchi musobaqa tarixida bir mavsum ichida uch xil klub safida 10 yoki undan ko‘p gol urgan ilk futbolchiga aylandi. U Dortmundning “Borussiya”, Myunxenning “Bavariya” va “Barselona” safida ushbu natijaga erishgan
Ayni damda Levandovskining Chempionlar Ligasidagi gollari soni 105 taga yetdi. Bu ko‘rsatkich bilan u turnir tarixidagi eng yaxshi to‘purarlar ro‘yxatida uchinchi o‘rinda bormoqda. Krishtianu Ronaldu (140 gol) va Lionel Messi (129 gol) kabi futbolchilar Robertdan yaxshiroq natija qayd etgan.
Ma‘lumot uchun, “Barselona” — “Borussiya D” bahsida ispan klubi 4:0 hisobida g‘alaba qozondi. Ushbu jamoalar o‘rtasidagi javob bahsi 15-apreldan 16-aprelga o‘tar kechasi bo‘lib o‘tadi.
Izoh (0)