Bir mashinani ikki kishi bo‘lib boshqarganlarga chora ko‘rildi, deb xabar bermoqda Surxondaryo viloyati YHXB axborot xizmati.
Unda keltirilishicha, transport vositasini boshqarish jarayonida o‘zlaring xavfli va bachkana harakatini tasvirga olib, ijtimoiy tarmoqlarga joylagan huquqbuzarlar bilan tushuntirish ishlari olib borilgan.
Yigit sevgan qizi iltimos qilganini ta’kidlab, barchadan uzr so‘radi: “Yaxshi ko‘rgan qizim iltimos qilgani va oyog‘i pedalga yetmagani uchun haydashga ruxsat bergandim. Qilgan ishimdan pushaymonman. Videoni ko‘rib, o‘zim ham uyalib ketdim”.
Bundan tashqari, qiz ham qilmishidan pushaymon ekanini, holatdan uyalganini aytib, uzr so‘radi.
Yigit Ma’muriy javobgarlik to‘g‘risidagi kodeksga muvofiq javobgarlikka tortildi.
Bundan avval Toshkentda o‘z “Gelik”ining oynasini sindirgan er-xotin sud qilingan edi. Shuningdek, Samarqandda axloqqa zid harakatlar qilib, ijtimoiy tarmoq “yulduzi”ga aylanganlar uzr so‘rab chiqdi.
2024-yilning iyun oyida 21 yoshli qiz viloyatliklarni tilga olib bo‘lmas so‘zlar bilan haqorat qilib, shu qilmishi uchun 15 sutkaga qamalgandi. O‘sha yilning iyul oyi o‘rtasida Instagramʼdagi jonli efirda “qishloqilar odammas” deya haqoratlagan qiz jarimaga tortilgan edi. Instagram’da salbiy fikr bildirgan kuzatuvchilarga javob tariqasida behayo so‘zlar bilan viloyatliklarni haqorat qilgan qiz 10 sutkaga qamalgandi.
Shuningdek, Toshkent aholisini haqorat qilgan qiz 10 sutkaga qamalgan edi.
Izoh (0)