Qozog‘iston qishloq xo‘jaligi vaziri 4-aprel kuni mamlakatga tovuq tuxumlarini olib kirishni taqiqlash to‘g‘risidagi buyruqni imzoladi. Bu haqda “Zakon.kz” xabar berdi.
Qozog‘iston hududiga uchinchi mamlakatlardan va Yevrosiyo iqtisodiy ittifoqi (YOII) davlatlaridan yangi tovuq tuxumlarini barcha turdagi transportda olib kirishga olti oy muddatga taqiq joriy etilsin, deyiladi buyruq matnida.
Tuxumlarni Qozog‘iston hududi orqali boshqa davlatlarga yetkazib berish davom etadi. Vazirning yuqoridagi buyrug‘i 9-apreldan kuchga kiradi.
Qishloq xo‘jaligi vazirligi tushuntirishicha, bahor-yoz mavsumida mahalliy ishlab chiqaruvchilarni qo‘llab-quvvatlash maqsadida tuxum importiga vaqtinchalik taqiq o‘rnatilgan.
Chunki ushbu davrda odatda tuxumga bo‘lgan talab pasayadi, bozor ehtiyojlari sanoat ishlab chiqarishi va uy xo‘jaliklari mahsulotlari hisobiga to‘liq qoplanadi. Bu esa tuxum narxining tushishiga olib keladi va parrandachilik fabrikalari faoliyatiga hamda ishlab chiqarish rentabelligiga salbiy ta’sir ko‘rsatadi.
Shuningdek, ushbu davrda tuxumning saqlash muddati qisqaradi. Ammo texnologik jarayonlar barqarorligi sabab ishlab chiqarish hajmi kamaymaydi, bu esa omborlarda ortiqcha mahsulot zaxirasining to‘planishiga olib keladi.
Ko‘rsatilgan omillarni hisobga olgan holda, Tashqi savdo siyosati masalalari bo‘yicha idoralararo komissiyada Qozog‘iston hududiga tovuq tuxumlarini olib kirishga vaqtinchalik cheklov choralarini belgilash maqsadga muvofiqligi ma’qullandi, deb xabar qildi vazirlik.
Izoh (0)