Tokio-2020 Olimpiadasi bronza medali sovrindori, jahon chempionatining ikki karra kumush medali egasi Kamshibek Konkaboyev yana bir bor o‘zining prinsipial raqibi — o‘zbekistonlik Bahodir Jalolovga qarshi ringga chiqishga tayyorligini bildirdi. Bu haqda Sportnews nashri xabar berdi.
Sportchi jurnalist Akerke Omirhon bilan suhbatda jang tashkil qilinsa, Jalolovga qarshi ringga chiqishga tayyor ekanligini bildirgan:
Agar jang tashkil etilsa, Bahodir Jalolov bilan yana bir marta ringga chiqishga tayyorman. Albatta, bu qiziq jang bo‘ladi. Hozirda professional boksda faoliyatimni davom ettirish yoki yo‘qligi haqida o‘ylab ko‘ryapman, deydi Konkaboyev.
Avvalroq Qozog‘iston boks federatsiyasi bosh murabbiyi Qayrat Satjanov Konkaboyev havaskor boksdagi faoliyatini yakunlaganini ma’lum qilgandi.
Ma’lumot uchun, havaskor boksda Konkaboyev va Jalolov o‘rtasidagi og‘ir vazn toifasidagi janglar doimo muhim qarama-qarshiliklardan biri sifatida qarab kelingan. Ular o‘zaro 10 marta ringda to‘qnash kelishgan va ularning aksariyatida o‘zbekistonlik bokschi g‘alaba qozongan.
Izoh (0)