Toshkent shahrining Sergeli tumanidagi xususiy maktab o‘quvchisi shu maktabda ishlovchi to‘garak rahbari tomonidan kaltaklangan. Bu haqda “Daryo”ga kaltaklangan bolaning yaqinlari xabar berdi.
Ma’lum bo‘lishicha, voqea 2025-yilning 4-aprel kuni sodir bo‘lgan.
O‘g‘lim Abdullohni Sergelidagi “Mudarris” maktabiga o‘qishga bergandim. 7-sinfda o‘qiydi. Uning shaxmat ustozi bor ekan, tadbir bo‘layotgan paytda u o‘g‘limni urgan. Farzandim tadbir paytida sinfdoshi ukasining mazasi qochib qolganini aytmoqchi bo‘lib, uning oldiga borganida o‘qituvchi dastlab bolamning boshiga urgan. Keyin voqea joyida kamera borligi uchun uni kamerasiz xonaga olib o‘tib kaltaklagan. O‘g‘lim o‘qituvchisining kaltaklashi oqibatida yopiq bosh miya ichki jarohatini olgan. Xususiy klinikada ham tekshirtirdim, aynan shunaqa jarohat chiqyapti, deydi voqea haqida gapirgan Sherali Mahmudov.
Murojaatchining aytishicha, u kecha, 7-aprel kuni farzandini Chilonzor tumanidagi respublika Shoshilinch tez tibbiy yordam ilmiy markaziga ham olib borgan.
16-balnitsa’da ham bosh miya ichki jarohati deyishdi. Shifokorlar 102 qilishgan, IIBdan ariza olishgandi. Ammo natija yo‘q. Shu sabab kecha, 7-aprel kuni Sergeli tuman prokuraturasiga murojaat qilib, IIB xodimlarining harakatsizligini aytdim. Shunday bo‘lsa-da, natija yo‘q. Shu bois jurnalistlarga voqeani aytyapman, deydi murojaatchi.
Sherali Mahmudov “Mudarris” xususiy maktabiga borib, voqea sodir bo‘lgan paytda kameraga tushgan videoni olgan.
Maktab direktori shaxmat o‘qituvchisini ishdan olganini aytgandi. Lekin o‘qituvchi yana maktabda faoliyat yuritayotgan ekan. Direktordan nega aldashganini so‘raganimda o‘zi 8 soat darsi bor edi, shuni o‘tib berib ketadi deyishdi, deydi u.
“Mudarris” xususiy maktabining Sergeli filiali direktori Zamira Sulaymonova “Daryo” jurnalisti bilan suhbatda voqea kaltaklangan o‘quvchisi haqida ekanini bilgach, darsda ekanini, keyinroq o‘zi qo‘ng‘iroq qilishini bildirdi. Takroriy qo‘ng‘iroqqa javob bermadi. Maktabda akademik direktor sifatida faoliyat yurituvchi Sohibxon Ibragimovning ma’lumot berishicha, voqeadan so‘ng shaxmat to‘garagi rahbari ishdan olingan. Maktab direktoriga hayfsan berilgan.
Videoni ko‘rganimda shaxmat to‘garagi rahbarining bola boshiga bir marta urganini ko‘rib, unga maktabda joy yo‘qligiga amin bo‘ldim. Tan olish kerak to‘garak rahbari ancha tajribali, namunali xodimlardan biri edi. Yaxshi kadrdan ayrilish maktab uchun ham yomon. Biroq pedagogga xos bo‘lmagan xatosi uning shu yaxshi tomonlarini ham yopib ketdi. Uni ishdan oldik. Maktab direktoriga ham shunday holatga e’tiborsizlik qilgani uchun hayfsan berdik, deydi maktab mas’uli.
“Daryo” voqealar rivojini kuzatishda davom etadi.
Izoh (0)