4-aprel kuni Toshkentdagi O‘zbekiston Milliy kino sanʼati saroyida “Chimildiq” badiiy filmining yopiq premyerasi o‘tkazildi.
Filmda bosh qahramonlar Tohir va Zuhra bir-birlarini sevib turmush qurgan, lekin arzimas turmush mojarolari sabab ajrashishga qaror qilishadi.
Ajrim qarori chiqishi bilan ular xursand holda ikki tomonga yo‘l oldi. Endi ular ozod qush misol yangi hayot sari oshiqmoqda. Biroq taqdirning kutilmagan tuhfasi tufayli ular tunda qayerda uyquga ketishmasin, ertalab yasatilgan chimildiq ichida uyg‘onishadi. Chimildiq bilan bog‘liq bu voqea orqali film ijodkorlari nikohning muqaddasligi va arzimas maishiy mojarolar tufayli oilani barbod qilmaslikka chaqirishadi.
Ushbu film nafaqat O‘zbekistonda, balki xalqaro miqyosda katta qiziqish bilan qarshi olinmoqda.
Xususan, film qozog‘istonlik, ozarbayjonlik ijodkorlar tomonidan qozoq va ozar tillariga dublyaj qilindi va 10-aprel kuni Ozarbayjonning Boku shahrida, 16-aprel kuni qo‘shni Qozog‘istonning Olmaota va 17-aprel kuni Chimkent shaharlarida premyerasi bo‘lib o‘tadi.
Filmda asosiy rollarini aktyorlar Dadaxon Obidov, Sitora Alimjonova, Muhammadiso Abdulxairov, Xosiyat Husanova, Tolib Mo‘minov, Muyassar Berdiqulova, Dilshodbek Kattabekov, Zuhra Soliyeva, Said Muxtorov, Bobur Aytbaganbetov, Mohlaroy Sobirova, Bobur Pirmatov, Aziza Abdullayeva, Karomat Isamova, Nurjahon Haydarovalar mahorat bilan ijro etishgan.
Izoh (0)