Xalq deputatlari Bekobod tumani Kengashining navbatdan tashqari sessiyasi bo‘lib o‘tdi, deb xabar berdi Toshkent viloyati hokimligi.
Sessiya kun tartibiga tashkiliy masala kiritildi. Sessiya ishida Toshkent viloyati hokimi Zoyir Mirzayev ishtirok etdi va kun tartibidagi masala yuzasidan nutq so‘zladi.
Viloyat hokimi o‘z so‘zida tumanni iqtisodiy-ijtimoiy rivojlantirishga doir va kechiktirib bo‘lmaydigan dolzarb masalalarga to‘xtaldi. Jumladan, xizmatlar, investitsiya, byudjet tushumlarini taʼminlash borasida hudud bugun viloyatda eng oxirgi o‘rinlarda ekanligi qayd etildi.
Tuman hokimi lavozimida ishlab kelayotgan Shuhrat Do‘stbekov yo‘l qo‘ygan xato-kamchiliklari uchun lavozimidan ozod etildi.
Zoyir Mirzayev Bekobod tumani hokimi lavozimiga Zaynilobiddin Nizomiddinov nomzodini tavsiya qildi. Xalq deputatlari Bekobod tumani Kengashida Zaynilobiddin Nizomiddinov tuman hokimi etib tasdiqlandi.
2022-yilning iyul oyida Zaynilobiddin Nizomiddinov Prezident administratsiyasi rahbari lavozimidan ozod etilgan edi. U keyinroq O‘zbekiston kasaba uyushmalari federatsiyasi raisining birinchi o‘rinbosari lavozimiga saylangandi.
Izoh (0)