Raqobatni rivojlantirish va iste’molchilar huquqlarini himoya qilish qo‘mitasi elektrozaryad stansiyasi yoki avtoturargoh joyida transport vositasini to‘xtatganlik uchun noqonuniy tarzda to‘lov talab qilinsa, murojaat qilishga chaqirdi.
Qo‘mitaning bildirishicha, Vazirlar Mahkamasining 2013-yil 31-iyuldagi qarori bilan tasdiqlangan “Avtomototransport vositalarining doimiy va vaqtincha saqlash joylarini tashkil etish va ulardan foydalanish tartibi to‘g‘risida”gi nizomga muvofiq, transport vositalarini saqlash (to‘xtash) uchun to‘lov undirish maxsus ruxsatnoma (litsenziya) asosida amalga oshiriladi hamda belgilangan tariflarga muvofiq bo‘lishi shart.
Elektrozaryad stansiyalari hududida to‘xtash uchun to‘lov undirish faqat operatorda tegishli ruxsatnoma mavjud bo‘lgan taqdirdagina, qonuniy hisoblanadi. Agar ushbu xizmat ko‘rsatuvchi subyekt maxsus ruxsatnomaga ega bo‘lmasa, to‘lovlarning undirilishi qonunga zid deb hisoblanadi.
Bunday hollarda Raqobatni rivojlantirish va iste’molchilar huquqlarini himoya qilish qo‘mitasining 1159 qisqa raqamiga murojaat qilish mumkin.
To‘xtash (avtoturargoh) joylariga qo‘yiladigan asosiy talablar:
- litsenziyalash: operatorlar belgilangan tartibda ro‘yxatdan o‘tishi va maxsus ruxsatnomaga ega bo‘lishi shart;
- tashkiliy talablar: avtoturargoh joylari belgilangan texnik va sanitariya me’yorlariga muvofiq tashkil etilishi zarur;
- tariflarning ochiqligi: to‘xtash uchun tariflar ochiq-oydin, shaffof bo‘lishi va mahalliy xalq deputatlari kengashi tomonidan tasdiqlangan chegaralardan oshmasligi lozim;
- mashinalar saqlanishi uchun javobgarlik: operator avtoturargohda qoldirilgan transport vositalarining butligi va xavfsizligini ta’minlash uchun mas’uldir. Ular mashinaning o‘g‘irlanishi, buzilishi yoki shikastlanishi uchun javobgarlikni o‘z zimmasiga oladi;
- davlat nazorati: soliq organi tomonidan avtoturargohlar faoliyatining qonunga muvofiqligi muntazam nazorat qilib boriladi;
- soliq majburiyatlari: avtoturargoh xizmatini ko‘rsatuvchi subyektlar o‘z faoliyati uchun belgilangan soliq va majburiy to‘lovlarni o‘z vaqtida to‘lashi shart;
- faoliyatni alohida hisobga olish: agar yuridik shaxs avtoturargoh xizmati bilan birgalikda boshqa faoliyat bilan ham shug‘ullansa, har bir faoliyat turi bo‘yicha alohida hisob yuritilishi lozim.
- yerdan foydalanish: avtoturargoh faoliyati yerdan foydalanish huquqini tasdiqlovchi hujjatlar asosida yuritilishi shart. Yerdan huquqiy asossiz foydalanish qonunga xilofdir va javobgarlikka sabab bo‘ladi.
“Iste’molchilarning huquqlarini himoya qilish to‘g‘risida”gi qonunning 12-moddasiga ko‘ra, iste’molchilar o‘zlariga taqdim etilayotgan tovar va xizmatlarning sanitariya-gigiyena, xavfsizlik talablariga muvofiq bo‘lishiga hamda o‘z hayoti, sog‘lig‘i, atrof-muhit va mol-mulki uchun xavfsiz bo‘lishiga kafolat berilishini talab qilish huquqiga egadir.
Toshkent shahrida 200 mingdan ortiq pulli to‘xtash joylarini tashkil etish rejalashtirilgan. 2025-yil iyulidan boshlab pulli avtoturargohlar ommaviy ravishda joriy etilishi kutilmoqda.
Izoh (0)