Yaponiyaning dunyoga mashhur Kawasaki brendi yugurish va sakrash xususiyatiga ega Corleo robot otini namoyish etdi. Bu haqda kompaniya saytida xabar berdi.
Kawasaki uni odamlarga ilgari mavjud bo‘lmagan joylarga xavfsiz sayohat qilish imkonini beruvchi “shaxsiy mobillikning kelajagi” deb atamoqda. Biroq kompaniya 2050-yilga kelib uni ommaviy ishlab chiqarish imkoniyatini ko‘rib chiqmoqda. Avvalo tematik bog‘lar, ko‘ngilochar markazlar va xususiy kolleksionerlar uchun foydalanishga mo‘ljallanadi. Texnik tafsilotlar unchalik ko‘p emas, ammo shunisi ma’lumki, Corleo 150 kubometrli vodorod dvigateliga ega.
U elektr energiyasi ishlab chiqaradi va bu quvvat robotning har bir oyog‘idagi motorlarga uzatiladi. Robotning “miyasi” o‘rnida esa sun’iy intellektli bort kompyuter ishlaydi — u atrofdagi holatni tahlil qilib, barqarorlikni ta’minlaydi.
Bu shunchaki transport vositasi emas, balki har qanday joyda harakatlanishi, hatto qorli tog‘larda ham sakrashi mumkin bo‘lgan to‘rt oyoqli yo‘ltanlamas, deyishmoqda Kawasaki vakillari.
Texnologiya vodorod darajasi, cho‘qqigacha bo‘lgan yo‘l va boshqa ma’lumotlarni ko‘rsatuvchi asboblar paneli bilan jihozlangan. Tunda esa oldindagi yo‘lni ko‘rsatish uchun yo‘l yuzasidagi belgilarni proyeksiyalab beradi.
Robot ot odamni kunduzi ham, kechasi ham tog‘lar, dalalar va o‘rmonlar bo‘ylab olib yuradi. Texnologiya aks etgan video neyron tarmoq yordamida yaratilgan va ishlab chiquvchilarning qurilma funksiyalari haqidagi tasavvurlarini aks ettiradi.
Izoh (0)