UEFA Chempionlar Ligasi 2023/24-yilgi mavsumi yakunlariga ko‘ra, Madridning “Real” klubi eng katta miqdorda mablag‘ ishlab topgan jamoa bo‘ldi. Turnirda g‘oliblik, barcha bosqichlardagi ishtirok va teletranslyatsiyalardan tushgan daromadlar orqali “qaymoqranglilar” umumiy hisobda 139 million yevroga yaqin foyda ko‘rgan.

Shundan 125 million yevroni barcha bosqichlardagi ishtiroki hamda musobaqa g‘olibligi ortidan qo‘lga kiritgan bo‘lsa, 14 million yevro telehuquqlardan ishlab topgan.
Ushbu reytingning ikkinchi pog‘onasidan Parijning “PSJ” klubi joy oldi – fransuz grandi o‘tgan mavsum YCHL ortidan 122,4 million yevro qo‘lga kiritgan. Kuchli uchlikni esa finalgacha yetib borgan Dortmundning “Borussiya” jamoasi yakunladi – klub 120 million yevro foyda olgan.
“Manchester Siti” 110,5 million yevro ishlab topgan bo‘lsa, UEFA Superkubogida ishtirok etgani uchun yana 4,5 million yevro mukofot oldi. “Barselona” esa YCHLdagi ishtiroki evaziga 98 million yevro daromad oldi.
Guruh bosqichidayoq musobaqani tark etgan va o‘z guruhida oxirgi o‘rinni egallagan “Manchester Yunayted” ham taxminan 61 million yevro ishlab topishga muvaffaq bo‘ldi. Turnir ishtirokchilari orasida eng kam mablag‘ ishlab topgan klub — Belgiyaning “Antverpen” jamoasi bo‘ldi. Ular 22 million yevrodan kamroq mablag‘ olgan.
Yevropa Ligasi bo‘yicha esa eng ko‘p daromad olgan klub Leverkuzenning “Bayer” jamoasi bo‘ldi – finalgacha yetib borib, “Atalanta”ga yutqazgan nemis klubi 41,2 million yevro daromad ko‘rdi. G‘olib chiqqan “Atalanta” esa 34 million yevroga yaqin pul ishlab topgan.
Umuman olganda, 2023/24-yilgi mavsumda UEFA klublar o‘rtasidagi yevrokuboklar uchun umumiy mukofot jamg‘armasi 2,2 milliard yevrodan oshdi. Yangi mavsumda esa turnirlar formatining isloh qilinishi sababli byudjet yana 25 foizga oshirilgan.
Izoh (0)