Senat raisi Tanzila Norboyeva Parlamentariy ayollar forumida O‘zbekiston parlamentda xotin-qizlar ulushi bilan Osiyo mintaqasidagi eng yuqori ko‘rsatkichni qayd etganini maʼlum qildi.
Uning so‘zlariga ko‘ra, so‘nggi 30 yilda mamlakatlar parlamentlaridagi ayollar ulushining 11,3 foizdan 27,2 foizgacha o‘sishida Parlamentariy ayollar forumining ham hissasi katta. Ushbu anjumanda 120 ga yaqin mamlakatdan delegatsiyalar ishtirok etayotgani ham forumning global ahamiyati, gender tenglik masalasi esa assambleyaning diqqat markazidagi mavzu ekanini ko‘rsatadi.
Respublika darajasidan, eng quyi bo‘g‘in – mahallagacha xotin-qizlar masalalari bilan shug‘ullanadigan uzviy tizim yo‘lga qo‘yildi. Xotin-qizlarning ijtimoiy-iqtisodiy faolligini oshirish, ularni qo‘llab-quvvatlash bo‘yicha yangi mexanizmlar yaratildi.
Amalga oshirilgan ishlar samarasini xotin-qizlarning taʼlim, tadbirkorlik, davlat boshqaruvi va boshqa sohalarda faolligi oshishida kuzatish mumkin.
Jumladan, hozirgi kunda oliygohlarda taʼlim olayotgan talabalarning yarmidan ziyodini qizlar tashkil etmoqda. Buning uchun yosh xotin-qizlarga davlat tomonidan turli imtiyozlar joriy etilgan. Shuningdek, so‘nggi yillarda ishbilarmon ayollar safi ikki barobarga kengayib 205 mingdan oshdi. Maqsad iqtisodiyoti yiliga 6 foizdan o‘sib borayotgan O‘zbekistonda turli sohalarda xotin-qizlar tadbirkorligini keng rivojlantirishdan iborat ekani aytildi.
“Biz o‘z siyosatimizda xotin-qizlar turmush darajasini oshirish, ularga nisbatan turli notengliklarni bartaraf etish, ayniqsa, iqlim o‘zgarishi salbiy taʼsirlari, zo‘ravonlik va kamsitilishlarning oldini olishga qaratilgan maxsus tadbirlarni amalga oshirishni eng ustuvor vazifalar sifatida belgilab olganmiz.
Bugun zamonning o‘zi barchamizdan o‘zaro harakatlarimizni uyg‘unlashtirish va faollashtirishni talab qilmoqda. Birinchi navbatda O‘zbekiston parlamentlararo hamkorlikda ayollar faolligini oshirish bo‘yicha xalqaro faoliyat, ayniqsa, mintaqaviy kesimda o‘z tajribasi bilan o‘rtoqlashishga tayyor. Jumladan, besh yil ilgari O‘zbekistonning tashabbusi bilan Markaziy Osiyo davlatlari yetakchi ayollari muloqoti (dialog) tashkil etilgan edi. Bugun ushbu format xotin-qizlarga oid mintaqa uchun xos bo‘lgan dolzarb masalalarni birgalikda hal qilishning samarali mexanizmiga aylandi.
Mazkur ijobiy tajribani Parlamentlararo ittifoqdagi boshqa mintaqaviy guruhlar doirasida ham joriy etish va shu orqali barcha mintaqalar rivojlanishida ayollar ishtirokini kengaytirishni maqsadga muvofiq, deb hisoblaymiz. Ikkinchidan, barqaror rivojlanish maqsadlari doirasida mamlakatlarimizda gender tenglikka erishish borasidagi natijalarni aniq indikatorlarga asoslangan holda baholash, bu borada har bir davlat o‘z oldiga qo‘ygan vazifalarni bajarishi yuzasidan qo‘shimcha chora-tadbirlarni belgilashi to‘g‘ri bo‘lardi”, deydi senat raisi.
O‘zbekistonda Tadbirkor ayollar kengashi tashkil etildi.
Uning vazifalari:
- muntazam ravishda hududlarga chiqib, tadbirkor xotin-qizlarning muammolarini o‘rganish va ularni bartaraf etish bo‘yicha takliflar ishlab chiqish;
- tadbirkor ayollarning ilg‘or tajribalarini boshqa hududlarda ommalashtirishga ko‘maklashish
- avval tadbirkorlik loyihalarini amalga oshirgan xotin-qizlar bilan manzilli ishlab, ularning muammolarini hal qilish va biznes g‘oyalarini amalga oshirishga ko‘maklashish;
- tizimli muammolarni hal qilish yuzasidan hukumat va qonunchilik palatasiga takliflar kiritib borish.
Tadbirkor ayollar kengashi Savdo-sanoat huzurida, 27 kishidan iborat tarkibda tashkil etiladi. Kengashga Prezident administratsiyasi mas’ul xodimi Nozima Davletova raislik qiladi.
Izoh (0)