Tonggi odatlar nafaqat kunni qanday boshlashni belgilaydi, balki bolaning maktabdagi faolligi, kayfiyati va diqqatini jamlashi uchun ham muhim poydevor hisoblanadi. Ular farzandingizning kun davomida o‘ziga ishonchini oshiradi hamda tetik his qilishiga yordam beradi.
Quyida bolalarga maktabda diqqatni jamlash va o‘quv faoliyatini yaxshilashga yordam beradigan 5 ta ertalabki odatlarni keltiramiz.
- Tongni bir stakan suv bilan boshlash
Suv organizmni uyg‘otadi, miyani faol ishlashga undaydi. Ertalab ichilgan bir stakan toza suv bolaning hushyorligini oshiradi va konsentratsiyasini yaxshilaydi. Bu oddiy odat, ammo juda foydali.
- O‘z vaqtida uyg‘onish
Farzandimizga yana 10-15 daqiqalik uxlab olishi uchun imkon berish bu mehribonlik emas, balki kun tartibini buzishdir. Bunday qilish bolaga foyda keltirmasligi mumkin, chunki kech uyg‘ongan o‘quvchi tongda ko‘p shoshiladi, biror narsasini unutadi va stressga tushadi. Shuning uchun bolani o‘z vaqtida yotqizib, ertalab esa doimiy tartibda uyg‘onishini odatga aylantirish muhim.
- Foydali va mazali nonushta
Nonushta — barcha yoshdagi odamlarning, jumladan o‘sib borayotgan bolalar organizmi uchun muhim energiya manbai. U nafaqat ochlikni qondiradi, balki aqliy faollikni ham qo‘llab-quvvatlaydi. Oqsil, murakkab uglevodlar va foydali yog‘lardan iborat nonushta farzandingizning butun kuni samaraliroq bo‘lishiga hissa qo‘shadi.
- Tongda gadjetlardan voz kechish
Telefon va planshetlar bolaning diqqatini chalg‘itadi. Ayniqsa ertalab, o‘qish va yangi bilimlarni egallashdan avval televizor ko‘rish ularning faollikni pasaytiradi va miyani to‘g‘ri ishga tayyorlamaydi. Eng yaxshi variant — ertalabki soatlarni ekranlarsiz o‘tkazish.
- Yengil jismoniy tarbiya
Badantarbiya — organizmni uyg‘otuvchi eng tabiiy usullardan biri. 5-10 daqiqalik mashqlar qon aylanishini yaxshilaydi, miyani kislorod bilan boyitadi va kunni faol kayfiyatda boshlashga yordam beradi.
Xulosa o‘rnida
Farzandingiz ertalabki odatlarini to‘g‘ri tashkil qilish orqali siz uning maktabdagi muvaffaqiyati uchun mustahkam poydevor yaratasiz. Yuqoridagi 5 ta oddiy qadam orqali har bir tongni foydali, tinch va ijobiy boshlash imkoniyati tug‘iladi.
Izoh (0)