“Uzuklar hukmdori” trilogiyasida Frodo Beggins obrazini yaratgan aktyor Elayja Vud Business Insider nashriga bergan intervyusida mazkur milliardlab daromad keltirgan loyihadagi ishtirokidan olgan gonorari unga “butun umr moliyaviy muammolarsiz yashash imkonini bermagani”ni tan oldi. Bu haqda “Pravila jizni” xabar berdi.
Aktyorning so‘zlariga ko‘ra, buning asosli sabablari bor. Birinchidan, o‘sha vaqtda filmni ishlab chiqarish jarayoni juda faol va keng ko‘lamda olib borilgan:
Biz bir emas, balki birdaniga uchta filmni suratga olayotganimiz uchun har bir qismning mashhurligiga qarab shartnomalarni qayta ko‘rib chiqish imkonimiz bo‘lmagan. Boshqacha qilib aytganda, Frodo roli menga butun umrga yetadigan moliyaviy mustaqillikni kafolatlaydigan daromadli loyiha emas edi, dedi Vud.
Biroq kichik gonorar tufayli aktyor xafa bo‘lmagan, chunki uning fikricha, mazkur trilogiya kino ixlosmandlari uchun abadiy yaxshi loyihalardan biri bo‘lib qoladi:
“Uzuklar hukmdori” men uchun bebaho tajriba, shuning uchun hech narsadan afsuslanmayman, deya izoh berdi aktyor.
Bundan tashqari, film unga va boshqa ishtirokchilarga puldan ko‘ra ko‘proq yutuq bergan, jumladan, Elayja Vud kino sohasidagi faoliyatini muvaffaqiyatli tarzda davom ettirgan,o‘zining SpectreVision nomli kinokompaniyasini tashkil qilgan va hozirda faol ravishda filmlar suratga olish bilan shug‘ullanmoqda.
Avvalroq “Uzuklar hukmdori”da Galadriel obrazini ijro etgan Keyt Blanshett ham gonorar mavzusi haqida so‘z ochgan edi. Aktrisa Watch What Happens Live teledasturiga bergan intervyusida yaratgan obrazidan “hech kim hech qancha pul ishlamagan”ini aytdi. U hech kim katta pul topmaganini, o‘zi esa faqat bepul sendvichlar va obrazidagi elflarga xos quloqlarni suvenir sifatida olgani haqida so‘zlab bergan.
Izoh (0)